周二英格蘭足總盃第四圈重賽，紐卡素喺領先兩球下，最終要踢到加時尾段先以3:2絕殺英甲牛津聯，更戲劇性嘅係，當辛特麥斯明射入奠勝球後，一名紐卡素球迷興奮到喺看台上露「鳥」慶祝。
紐卡素憑桑恩朗達夫及祖連頓先後破網，30分鐘已經取得2:0領先優勢。但「喜鵲」之後無以為繼，被牛津聯喺補時階段追成2:2平手，雙方要加時再賽。踢到116分鐘，法國中場辛特麥斯明殺入禁區後勁射得手，紐卡素再度領先，一名興奮嘅紐卡素球迷被拍到拉起外套，稍為拉低褲頭並將手伸到下體位置有所動作，呢一幕比起場波更精采。
朗尼領打比倒戈曼聯
另一場重賽由英冠打比郡主場英乙諾咸頓，朗尼下半場射入12碼，協助打比郡贏4:2，晉級16強後將會倒戈曼聯，係朗尼自2018年1月1日喺愛華頓主場以0:2不敵曼聯嘅比賽後，首次再鬥佢曾經效力13年嘅「紅魔」。