鬧前鋒荒嘅曼聯喺冬季轉會窗最後一日，喺中超上海申花借嚟前屈福特前鋒恩哈路加盟，呢位30歲尼日利亞射手由中國飛到英國後，禮拜一朝早被記者影到佢行出居住嘅酒店門外，同朋友有傾有笑。着住灰色衞衣、由武漢肺炎重災區中國抵英嘅恩哈路，冇自我隔離之餘仲唔戴口罩，近距離同個細路傾完偈又向現場嘅記者揮手，似乎佢同朋友都冇乜防疫意識，恩哈路亦似乎唔擔心自己係帶菌者，唔知曼聯幫恩哈路體測個陣，有冇做埋武漢肺炎嘅快速測試呢？另外，曼聯周二喺官網宣佈，恩哈路將會着25號波衫，成為效力10年嘅前隊長路爾斯華倫西亞喺上年離隊後，呢件波衫嘅新主人。不過，有傳曼聯借入恩哈路前，竟然曾經考慮過買白禮頓嘅36歲前鋒格連梅利，倒不如聽尹佩斯講，夏天專心爭入球機器卡雲尼好過喇！