都話人生係變幻莫測㗎啦！有邊個估到，民主黨創黨主席馬丁李柱銘嗰位都係做大狀嘅公子李祖詒（Joseph），會同莎莎老闆郭少明細女郭詩雅（Kitty）離婚。呢段婚姻只維持咗一年幾，最終「因了解而分手」，據悉，雙方已分手數月。
發聲明宣佈「分」事
雖然話律師、大狀做嘢把口好密，但講到行內八卦嘢囉喎，有幾多人忍到口吖。Joseph同老婆Kitty分開嗰單「新聞」，咪就係咁流出嚟囉，其實已傳咗一輪，嗰啲紅色打手亦都喺網上宣揚件事，內容矛頭指向馬丁啦，講到莎莎嘅生意因為呢個親家而大受影響咁話。
不過，Joseph出庭打官司嘅時候，八方又唔見佢有乜異樣喎！終於有機會可以親口向佢本人求證分手件事嘅時候，點知佢好爽快答話：「係呀！」仲話會出份聲明正式答八方㖭！份聲明係雙方聯合出嘅，內容話「懷着惋惜的心情宣佈，我倆經長時間考慮後，正式結束婚姻關係。我們曾經攜手度過不少美好的時光，但由於雙方性格上的差異，我們在和平的氣氛下作出此艱難的決定。」聲明結尾仲希望「各位給予我們私人空間，讓各自展開新的生活。」
內容係「行」咗啲，想再問多幾句係咪真係好似外界咁盛傳，佢哋之間係因為老竇嘅政治立場而受影響，但Joseph話冇嘢再補充喎！咁到底係咪呢？讀者就要自己諗喇！