武漢肺炎疫情持續擴散，本月的渣打馬打松被迫取消，師承陳家豪的黃芷銦坦言感可惜，只因她今年對「香港人」這身份認同感受更深。比賽取消可以等下一次，但面對突如其來的傷患，運動員只能用堅持及耐性走出困境。黃芷銦在2017年轉成全職跑手後不斷取得佳績，但她18年起受右腳亞基里斯及右膝膝外側髂脛束（ITB）困擾，心情一度跌入谷底。不過，傷患難阻芷銦追夢的腳步，她視姚潔貞為目標，盼有朝一日能像師母一樣代表香港登上奧運舞台。
記者：許嘉明
攝影：李家皓
芷銦在小學開始游泳及打排球，直至初中開始接觸跑步，首次參加D3學界越野賽便於C grade奪冠，這份成功感令芷銦如上癮般愛上跑步。不過，芷銦透露在17年大學畢業前，自己從未考慮以長跑作為職業，她笑言：「大學畢業嗰陣，教練陳家豪問我想唔想試吓做全職，同埋有冇夢想過去奧運。佢話潔貞係一個人辦，我可以跟住佢做。」芷銦抱着試試的心態成為運動員，但跟家豪及潔貞相處時間越長，令自己越有堅定跑下去的決心，芷銦不諱言師母對自己影響深遠，「佢生完BB都破到香港紀錄，可見決心有幾大。佢令我明白到，『我有幾想，就去到幾遠』呢一點。」
腳踏實地目標巴黎奧運
下定決心去跑，芷銦17年已代表香港出戰亞洲馬拉松錦標賽，成績穩步上揚之際，卻被突如其來的傷患困擾，在18年右腳亞基里斯及右膝膝外側髂脛束接連受傷。她直言傷情反覆，自己的心情也像過山車一樣大起大落，「我第一次面對傷患，個打擊好大，會唔知點面對，有時會好迷茫。」她坦言心情受痛楚程度影響，試跑狀態好時感到雀躍，但未如理想時可以低落一整天。經過一年多跟傷患搏鬥，芷銦已找出平衡點──盡量在自己控制範圍內繼續努力。她更笑言會更注意身體發出的警號，避免再傷，「有時有少少反應都會有啲緊張，但我覺得係好事，因為你越早知道個訊號，越早去處理，或者件事唔會變到太壞，甚至唔會變成一個傷患。」芷銦終克服傷患，去年在柏林馬拉松跑出個人最佳時間（2小時41分09秒），她指未必每次比賽都在最佳狀態，但仍會在能力範圍內竭盡所能，「我會將目光放遠啲，唔會話真係好痛都繼續跑，唔會勉強自己。因為知道你要有好嘅身體，先可以再提升去另一個層次。」
從當初抱着一試無妨的心態轉為全職跑手，芷銦三年過後目標越發清晰，她直言：「我越跑就越有諗法，就係想繼續突破自己。同埋見到個目標越嚟越近嘅時候，就越嚟越覺得自己係有機會去到奧運。」在香港當全職運動員並非易事，芷銦直言不願以玩票性質跑幾年，而是像潔貞一樣長跑長有，她更劍指24年巴黎奧運的馬拉松入場券，希望追隨師母腳步，代表香港出戰奧運：「𠵱家基本上個生活都係為咗訓練，我會腳踏實地咁做，如果你一講就講個好遠嘅目標，大家都會覺得好唔現實。但係當你逐步去達成一啲小目標嘅時候，就代表越嚟越近，真係有機會去（奧運）。」
芷銦笑言轉全職後的一大好處是能出國集訓。由於出國集訓動輒2、3星期，故芷銦轉全職後才有機會跟隨師母出外集訓。憶起首次集訓的時候，芷銦雙眼放光並高呼「好爽」，因為這是難得全情投入跑步的時間：「你每日嘅起居飲食，都係為咗你嘅練習去做，我覺得可以專注做一樣嘢，係好奢侈同好幸福嘅事。」
籃球健將家姐分享經歷
除家豪和潔貞這對師父師母外，家人亦是芷銦在追夢路上的最強後盾。芷銦笑言，家人一開始對自己轉成全職亦有所擔憂：「開頭嗰陣佢哋都有啲猶豫，覺得『你喺度做緊乜嘢』。當你練完好辛苦，但咁啱佢哋放工返嚟見到你喺度休息，就會覺得你無所事事，或者唔幫手做吓其他嘢。」從一開始的不理解，變成漸漸體諒，再到現時全力支持，全賴芷銦以行動告訴家人追夢並非兒戲：「後尾佢哋見到我有啲成績，覺得『可能你真係有努力喎』，跟住佢哋開始會明白，支持亦都多咗，都會嚟睇我比賽。」
家人能接受自己以運動員作為職業，芷銦透露全因胞姊──黃芷晴（阿一）作開路先鋒。現年30歲、中學時期就讀協恩中學並活躍於本地球壇的阿一，多次協助女甲球隊福建贏得聯賽冠軍，亦曾代表香港出戰亞運等國際賽事，打而優則教的阿一現為寶覺中學、浸會大學及女甲東方的教練。或許是阿一的經歷，令家人明白興趣同樣可化成職業，芷銦表示：「我家姐打籃球，佢都係運動員，𠵱家係教練，所以屋企人都比較接受同支持運動呢樣嘢。」
芷銦續指作為籃球員的姐姐同樣滿身傷患，故自己跟腳傷搏鬥時，後者亦深明自己的感覺，並會以過來人的身份給予鼓勵：「家姐會冇啦啦打電話嚟，或者whatsapp我，話邊個運動員都受傷同埋人哋點面對，我記得佢有畀過楊文蔚嘅報道我睇。其實諗番轉頭佢自己都係咁，有膝傷，亞基里斯腱又做過手術，但係佢都繼續打波，冇放棄過籃球，所以我覺得佢都係一個學習對像。」
呼籲運動員注意衞生
因武漢肺炎疫情持續擴散，渣打馬拉松24年來首次取消，參加過五屆渣馬的黃芷銦對此感到可惜，只因她今年對「香港人」這個身份認同感更深：「渣馬係本地一年一度嘅盛事，尤其是今年，覺得香港人呢個身份特別珍貴，所以想跑好啲，帶啲正能量同凝聚力畀香港人。」不過，芷銦認同一切需以公眾安全為大前提，「跑班嗰啲學生都準備咗好耐，見佢哋咁努力，但係比賽取消係好可惜。」她續指雖然經常運動有助提高免疫力，但運動員同樣要注意衞生：「自己衞生意識加強咗，搭公共交通工具都會戴口罩，同埋勤啲洗手。」