巴黎聖日耳門（PSG）嘅巴西前鋒尼馬，每年二月都會大搞生日P賀自己牛一，今年亦唔例外，佢禮拜日就喺巴黎搞咗場「白色派對」，慶祝自己禮拜三正式踏入28歲。不過球隊周中法甲快車就要鬥南特，教練杜曹已經批評過尼馬呢個P會影響軍心，結果尼馬禮拜一以肋骨受傷為由，被剔除喺作客南特嘅大軍名單外，真傷定被罰就不得而知喇。
全白造型疑派帽
尼馬嘅生日會每年都要求賓客有個dress code，前年就係着全套正經老西打埋煲呔，上年就一定要有紅色，今年就更加浮誇，一定要全身都係白。見到壽星公由頭到腳，由頂帽去到對鞋都係白色，就算連幫佢擔遮嗰位都全身白衫，成個白馬王子咁。
至於一眾PSG隊友同埋城中名人都有畀面出席，好似隊友卡雲尼、莫路伊卡迪、迪馬利亞，仲有效力里昂、養緊傷嘅迪比同佢哋嘅另一半都係全白應戰，一啲都冇hea主人家。另一位PSG當家球星基利安麥巴比，就因為要出席慈善活動所以夜啲先到。
派對期間，單身嘅尼馬仲被影到同一位巴西女歌手瑪拉莎行為親密，尼馬攬住瑪拉莎咬耳仔，然後突然向前索吻，瑪拉莎表現都相當受落。不過，原來瑪拉莎有個商人男朋友，唔通呢位壽星仔生日就送頂綠帽畀人戴？
杜曹暗寸冇紀律
話說法甲開緊快車，尼馬呢個生日會，正正夾喺PSG上周六對蒙彼利埃同周中對南特兩場波中間。其實，PSG教練杜曹上場賽後就已經講明尼馬呢個P會影響隊波：「咁樣做除咗會分心，仲會令人覺得我哋唔專業同唔認真。」不過就強調唔會因呢件事雪藏尼馬，但就有暗寸呢位巴西前鋒冇紀律，所以佢本人都冇出席。結果禮拜一，球會就話尼馬喺上周六嘅賽後檢查到肋骨受傷，將佢剔除出周二作客南特嘅大軍名單。不過見佢開P冇病冇痛，今次嘅缺陣好可能係杜曹秋後算賬「被受傷」，懲罰呢位野性難馴嘅球星。