睇完特首林鄭月娥周一傍晚嘅記者會，相信唔少港人媽媽聲，留低未封關嘅兩個陸路同一個機場三大缺口，都唔知放到幾多隱形病人入嚟播菌！查實點解要封剩呢幾個關口？有政界花生友就向八方提供另類「有趣」角度，話睇完就知林鄭今次唔封埋呢三個關，因為怕「大逆不道」。
點解大逆不道？因為三個口岸建設落成禮，先後由三任中共國家主席主持開幕禮喎。赤鱲角香港國際機場1998年7月2日嘅開幕典禮，由時任國家主席江澤民主持；到深圳灣口岸同公路大橋喺2007年7月1日開通，典禮就由時任主席胡錦濤剪綵。到2018年10月23日耗資1,200億元、爭議不斷嘅港珠澳大橋開通儀式，則由𠵱家領導緊中國抗疫嘅習近平「開光」！睇到呢到，林鄭近年不斷向北京表忠，又難怪呢位花生友一睇到三個未封口岸有歷任國家主席「加持」，隨即猜度林鄭心思。