【本報訊】醫護罷工救港，卻被指摘未有緊守崗位，表現遜沙士時期。參與罷工的醫護不乏沙士過來人，他們促請政府以封關堵截病毒，勿讓悲劇重演：「唔想再有一個醫護同事，我哋嘅手足死。」名醫黎青龍亦支持同儕罷工，批評港府將政治凌駕專業判斷。
「防範勝於治療」
港大醫學院內科及肝臟科講座教授黎青龍昨日到瑪麗醫院聲援罷工的醫護，他形容是次疫情之嚴重程度與沙士相近，但在沙士時，港府的抗疫決策明顯較好，「我就信防範勝於治療嘅，你係唔係想佢差先咩（採取行動）啊？」對於日前特首林鄭月娥指港府跟隨世衞指引不考慮封關作防疫措施，黎駁斥林鄭存心曲解該段文章的意思，「世衞從來冇講過唔可以封關」。
黎青龍稱，自己作為醫生有責任照顧病人，無法參與罷工，「但係佢哋罷工，我明白」。他承認罷工對公營醫療服務必然受到影響，但希望民間不要指摘醫護人員以罷工形式爭取「全面封關」，而應歸咎港府至今仍將政治凌駕專業判斷，「應該指摘點解佢（政府）唔封關，令我哋香港人唔安全。唔係淨係佢哋（醫護人員）安全，香港人都要安全」。
不畏沙士 護士怕同事送命
任職普通科門診護士達36年的莫小姐經歷過沙士疫潮，她指當年醫護人員緊守崗位，「就算沙士病人喺面前我哋都係照咁做，從來都無畏懼㗎，真係南丁格爾嘅精神，一入行就已經要知」。
不過，目前政府卻以政治凌駕醫護專業，迫使她將近退休之年首度罷工，「其實真係唔想罷工，我哋真係好專業同有責任感，唔想行到呢一步，但似乎政府係冇聽我哋訴求、罔顧廣大市民健康同生命，呢頭救得一啲人，另一頭又spread out（擴散），覺得好無力」。
另一同樣經歷過沙士的護士李小姐就指，她罷工的原因正正是希望保護港人健康，她形容沙士一役悲痛，「唔想再有一個醫護同事，我哋嘅手足死」。
李小姐指，香港邊境現時大開中門，每日大量內地人來港，「如果仲繼續無限量畀內地人落嚟用我哋嘅醫療設施，係完全冇可能做到」。她又批評政府工作太慢，不論邊境防疫、公眾教育以至物資準備，「全部都太慢，好似要推一推佢先郁一郁，原地踏步咁，令到我真係好嬲」。
■記者羅智堅、趙雅婷、李雨夢