現年50歲的黃振輝從小就立志做導演，後來誤打誤撞入了亞視做演員，解約後再入演藝學院學做戲，由茄喱啡做起，更曾與張學友合演音樂劇《雪狼湖》，但並非唱家班出身的他，唱功慘遭學友嫌棄，後來更陷入人生低谷。痛定思痛，他繼續發憤，現於劇團教戲及做編導，為自己殺出血路。
黃振輝1989年中五畢業後想考演藝，但錯過報名時間，於是入了第二屆亞視藝員訓練班，與蔡曉儀做同學，3個月畢業後就簽約4年，月薪4千。他說︰「蔡曉儀一出道就做女主角，我就做嘍囉，當年19歲仔，諗住做住先，但做做吓發覺亞視冇人睇，攞唔到知名度，於是就走去做兒童節目，貪佢爆騷。我同容錦昌拍住做《出位放送組》，我哋好玩得，表面正經講對白，其實枱下用腳互踩整蠱對方，加上爆騷賺成萬蚊，兩年儲咗十幾萬。」
在亞視短短兩年，黃振輝就提前解約考入演藝學院，讀了兩年深造課程，更有機會試鏡張學友主演的音樂劇《雪狼湖》︰「好緊張！面試時見到奚仲文同張學友腳都震，一去到就唱學友嘅《忘情冷雨夜》。收到電話可以演『老狼』，我開心到跳起。除咗學友同女主角嚴偉，我同謝天華都係主要角色。由排練3個月到演出，都有半年收入。」
「你個音唔夠準！」
正當黃振輝以為演藝路一帆風順，可惜事與願違：「排練嗰陣，張學友突然走到我面前話︰『阿輝！你個音捉得唔夠準！』兩個月後，副導演過嚟搭住我膊頭話︰『唔好話唔話畀你聽，其實我哋同葛民輝傾緊，你好自為之。』」黃振輝坦言當時感到非常失落：「如果想cut我，可以直接同我講，因為我一直好努力，但唱歌真係唔係我強項，最後佢哋改由教我哋聲樂嗰個老師做『老狼』，但佢有10日唔喺香港，就由我頂。呢個經歷好慘痛，好似拍拖咁，你要分手咪分囉，冇理由拖住我！但我好清晰自己係演員，唔係明星，只要做好本份就好。」
黃振輝之後效力於中英劇團，但他有感自己的演技停滯不前，當時香港興起教戲劇，31歲時開始轉做導師︰「未做導師前，因為接戲越嚟越少，我試過喺地踎商場開舖賣泰國精品，個個月冇糧出，嗰陣女友又嗌分手，係人生低谷。但最終我都係忠於自己，因為鍾意戲劇，於是又重返舞台，好彩中英劇團教育部搵我教戲，令我人生再現曙光。」
長者經歷變戲劇
教戲令黃振輝燃起另一團火︰「教長者做戲令我感受好深，我見到班老友記好認真，佢哋嘅熱誠感染我，於是就同鄰舍輔導會合作搞口述歷史劇，唔覺唔覺搞咗十年，越做越有滿足感。用佢哋親身經歷融入戲劇，由佢哋珍藏講起。有個婆婆攞咗個銀雞返嚟，係佢爸爸嘅遺物，當年香港被日軍侵襲，佢爸爸就係用銀雞通知大家快啲匿埋。佢哋家人嚟睇完戲，會攬住一齊喊，我唔只令佢哋重拾生命樂趣，得到社會認同，亦令佢同家人多咗話題，好有意義。」黃振輝有份籌備的劇目《玖歌》原定月中演出，就是9個女人講述的愛情故事，可惜因肺炎肆虐要延期演出。
撰文︰祖李
攝影︰陳俊強