【本報訊】醫護罷工首日，沙田威爾斯親王醫院外早上站滿排隊報到罷工的醫護人員。專科門診有員工罷工，但本報接觸多名病人，均說無論是覆診、配藥輪候時間和人龍跟以往相若，未見有太大影響。有病人擔心無法看診而預早致電醫院，確認可如常求醫。即使罷工升級或影響醫療服務，他們仍表示絕對認同，即使會對病人造成不便，亦會理解。
前來醫院配藥的何太說，明白疫情令醫護壓力百上加斤，極力贊成罷工行動，「佢哋真係好辛苦，政府反而cut（醫療）資源，拎1,000億起高鐵。表面上話起基建，但成千億只係令市民交通快十分鐘」。她回想以往多次長時間留院，感受到醫護人員工作繁重，「我之前喺醫院住，見到有個醫生做咗十幾個鐘頭，夜晚話放工，第二朝六點幾又見到佢，佢話已經返屋企休息咗再開工」。
轟逃兵論罔顧醫護生命
已懷孕八個半月的劉小姐到醫院照超聲波，回家後需徹底洗澡消毒，預產期為四月的她估計生產後，武漢肺炎的高峯期或仍未到，「自己有BB特別擔心，我可以戴口罩，BB戴唔到㗎嘛，𠵱家又係母嬰同床」。
早前聯合醫院有一對內地父母的初生嬰兒發燒，令劉小姐份外憂慮病毒或會感染病房內的嬰孩。不過她認為始終醫護人員風險最大，對親建制人士指摘醫護人員是逃兵，她不禁勞氣：「覺得醫護人員貪生怕死，佢自己入去醫院做吓義工先囉。人哋雖然係𢭃份糧，人哋都有家庭，醫護人員嘅生命都值錢㗎嘛，唔止病人生命值錢！」
覆診者稱等候時間更短
昨日到瑪嘉烈醫院覆診的張先生表示，只等候半小時便見到醫生，比平時快得多，估計其他人怕罷工會令等候時間變長，所以索性不來，變相他們更快可以覆診。他認為香港醫護人員本身非常負責任和專業，知道今日醫護罷工「我都支持㗎，一般嚟講醫護人員最好唔好罷工，會影響病人，但好似𠵱家香港咁嘅情況，我係醫生我都要罷工啦！呢啲兩回事嚟，我覺得係無可厚非，呢個政府太唔似樣啦！」
半退休人士盧先生則專程來撐罷工，他認同醫護以罷工迫使政府封關，要求十分卑微，非為一己利益，而是為全港福祉，「醫護做得好正確，佢哋係一步步嚟，唔係一嚟就停」，已給予政府足夠時間考慮，「差不多全港90%市民想你封關，調養好我哋啲病人，先再幫中國人，否則就只會攬炒」。
■記者陳詠恩