黃振輝90年代在演藝讀書時，賺錢機會多，當時電影蓬勃，做過不少茄喱啡角色，拍過劉德華的MV，也拍廣告。至於他最深刻的電影，就是與劉青雲拍《無味神探》︰「呢個係我電影戲份叫最多的角色，因為我成日喺青雲隔籬。」問到有否向青雲偷師？他說︰「可能青雲嗰陣太多戲，每次見佢好攰。講到好戲，我拍《江湖告急》時，梁家輝真係好戲、好犀利，佢喺喜劇與荒誕劇之間遊走，好到位，拍完搞笑，要做感情戲就即刻可以變臉。」
黃振輝又大讚任達華︰「佢當年喺亞視拍《還看今朝》，我喺佢身上睇到乜叫身教，除咗專業、準時同認真，最令我感動係有一場戲，啲臨記要跪喺度俾人行刑，華哥竟然喺保母車走落嚟，攞布同咕𠱸畀大家墊住個膝頭，呢件事深深印喺我腦海。」