近日香港全城焦點放係抗疫同鬧爆林鄭唔肯封關，相對反送中街頭抗爭少咗，連國際社會都少咗有關香港反送中報道，不過唔代表林鄭可以輕鬆過關，亦唔代表港人同國際社會已忘記五大訴求同追究警暴，好似正喺美國攻讀碩士嘅香港眾志常委羅冠聰噚日喺fb出po，話曾經親身訪港視察反送中抗爭運動嘅共和黨參議員Rick Scott，就邀請佢喺美國時間本周二，去國會出席總統特朗普發表《國情咨文》演說（State of the Union address）。
網民：講埋港府唔肯封關
羅冠聰喺fb話今次有參議員高調邀請香港嘅抗爭者出席重要嘅《國情咨文》演說，代表美國政壇朝野依然關注香港嘅抗爭，並跨黨派咁支持香港嘅民主運動，佢預料特朗普會喺國情咨文中提及中美貿易戰同對華政策，期望美國政界繼續關注中國極權擴張，共同守護自由民主。
好多網民留言撐羅冠聰，有人仲叫佢問Rick Scott，根據《香港人權及民主法案》整嗰份制裁名單，究竟幾時先出；亦有網民叫羅冠聰，「最好講埋香港政府唔肯封關」、「請將香港目前面對的疫情苦境，也轉達給能幫助我們的人」，八方睇到呢度，都忍唔住感嘆，究竟港人做錯乜嘢事，俾一女子搞完將港人送中、後生俾人打到頭破血流甚至要坐監，𠵱家又被同一女子搞到香港就快俾武漢肺炎攻陷！
李八方