【黑鏡線索】
《Spillover》一書，2013年出版，專講過去幾十年間嘅重大瘟疫，包括Ebola同AIDS。當然其中一章，係留咗畀03年嘅SARS。
呢一章大部份篇幅，都係講返當年個過程：點樣由第一個患者，傳畀超級傳播人，然後個教授，個教授落嚟香港參加婚禮，住維景酒店時又傳咗畀同層幾個人，其中一個返新加坡又做咗超級傳播人，另一個就去咗多倫多，等等等等。
本書嘅對象主要係冇經歷過嘅讀者，對於經歷過SARS嘅香港人，包括我自己，好多過程都有印象，只不過係補充一啲細節。
但當睇到呢章就嚟完，準備快啲睇佢講下一單瘟疫嘅時候，忽然作者提出一個問題：SARS一役，專家得出啲乜嘢總結？
勢估唔到，其中一個總結，係"humankind had a lucky escape."，經歷過沙士嘅人，正常反應係：吓？
SARS只死774人 執返身彩
專家有咁嘅總結，係因為以SARS咁毒嘅嘢嚟講，埋單8,000人感染，774人死亡，唔係7,000,000，喺傳染病學角度，其實執返身彩。
而最後係outbreak，唔係global pandemic，有兩個主要原因。
第一，頭幾個中招城市，包括香港、新加坡、河內、多倫多，都係一級醫療設備嘅城市，政府反應算係迅速。
第二，更重要嘅係，係症狀同散播嘅先後次序。通常，流感都係患者首先變得高傳染性，然後先至會有病徵。但咁啱，SARS係倒返轉。病人先係有明顯症狀在先，然後先會傳播。所以容易及早發現同送去醫院，亦都解釋到，點解通常醫護人員會係第一波被傳染嘅對象。
所謂人類喺SARS執返身彩，係指以上兩點，大幅減低咗疫情嘅規模。呢個總結有乜咁重要？專家成日諗點樣提防，點樣應對嘅，所謂繼100年前Spanish Flu之後最大鑊嘅Next Big One。歸納以上兩點，即Next Big One可能將會有以下特性：
政府管控差 抗疫慢半拍
第一，先喺啲疫情管控差嘅地方爆發，例如當地政府鍾意隱瞞、死拖，或者同市民有仇咁，抗疫吓吓特登慢半拍嘅城市。第二，隻病毒令患者先傳播後有病徵，或者病徵唔係好明顯，發現時早已經散播開去。如果兩樣加埋，就冇SARS嗰次咁「好彩」。
武漢肺炎WARS，正正就係傳播比病徵早，可以早出兩星期嘅潛伏期。呢點人類冇得控制，如果隻病毒唔係人造嘅話。但係政權嘅態度，如果出問題，就必定係人禍。
中国就唔使講，冇資訊自由，冇言論自由，有親瘟疫，就梗係用人民嘅命去維護極權嘅權威。但係香港？我曾經以為，2019嘅777，唔會被超越，點知2020一個月未夠，就俾2020嘅777，輕易趕過。777為咗奶共，為咗事事配合中国，為咗力保自己契弟嘅形象，不惜與民為敵到，衰過北韓都算，仲衰過澳門，澳門呀大佬！直頭冇聽過一個人，唔理黃絲藍絲泛民建制，認為777政權嘅處理，唔係送香港人去攬炒陪葬。
再有人問點解話一國兩制破晒產，你問佢，武漢肺炎嘅時候，政府死咗去邊？
撰文：宋漢生
fb : sunghsblog