農曆年假期，碰上武漢肺炎肆虐，全港恐慌，市民爭相購買口罩，在11至12度，寒風陣陣臨下，深夜在屈臣氏店外排隊，直至天明，乜嘢新年氣氛都冇晒，南華早報一張相片顯示，年初五公眾假期完畢之日，眾人本應上班，中環會人頭湧湧，點知畢打街遮打道交界處，一片靜寂，馬路竟然冇汽車，見到咁嘅場景，你仲敢買股票？難怪股市年初五復開就大瀉789點，到年初七一共跌咗近1600點。
以往左丁山在新年假期，必定到相熟會所吃午飯晚飯，係為了順便派利是。今年呢？成家人都話怕咗出街，情願在家食齋菜、食臘腸，煲個蘋果湯就算，出門只係去馬場。馬場內公眾棚馬迷不能入場，成個公眾棚擺空城計，氣氛全無，此乃2003年沙士之時冇見過嘅，即係話，2020年比2003年情況更差，己亥年年尾之慘淡，不忍卒睹，庚子年又會如何？
去年二月四日立春，左丁山講到水大旺，慎防水災，點知豬年全年雨水不算多，六月之後更少風雨，水災自然唔見影，萬萬想不到，林鄭修例引發連場社會運動，運動口號係Be Water，無論責任誰屬，Be Water運動令香港傷了元氣，呢場「大水患」之始作俑者當然就係林鄭月娥，楊天命師傅話林鄭生於丁酉年乙巳月乙酉日，左丁山粗略算之，林鄭六柱有兩酉，酉即陰金（辛），辛金生水，搞出Be Water運動，冥冥中嘅天意？
今日係立春，立春之前一日（二月三日）係四絕日，大事不宜，偏偏政府復工日期由年初五（破日）延至二月三日年初十（四絕日），早上返工時間（九點至三點）全是凶時，真煩氣。後因疫情有增無減，復工日繼續延後，係好啲嘅。今日二月四日嘞，八字如何？曾經搵八卦邱問一問，佢話武漢肺炎襲港，好少出街，閉門讀書，叫左丁山記住佢過往所述，自行盤算。立春八字係庚子年戊寅月丁丑日己酉時，屬丁火日，有一火二金三土一木一水。初春丁火，若要生機旺盛，必需甲木生火，而甲木又需庚金來削（即等於用斧頭削木成柴枝生火），立春八字之內，天干有庚金，地支有寅木藏甲，春天甲木又要有雨水滋潤（否則乾死），雨水即是子水。以此推測，立春丁火，有庚金劈甲生之，子水潤木，算是強火，今日出生之嬰兒若有此八字，應屬好命之列（先天）。至於一生成就如何？當然要有後天培育。丁火乃陰火，陰火有乜意思？首先火剋金，金融黃金受制，其次係火生土，房地產唔會衰得去邊，以此向八卦邱報告，佢話：「基本上幾好，只防八字有三土洩火太過，轉入下半年，雨水當道，變成水剋火，冇乜生氣了。」