農曆新年，人人例牌關心生肖運程及來年市況，每年之初更可謂是一眾堪輿學家最忙最旺的時間；惟對楊天命而言，今年情況有所不同。先是新鮮出爐的運程書，懷疑被政見不同的人複製成pdf版在網上免費流傳；後被客人告知「楊天命」一名在內地已被列為滋事分子，提醒他小心說話。
去年6月開始，楊天命時常在社交網絡平台上發聲表態，立場明確，現身遊行更是等閒事。「我個袋入面會有口罩、鹽水等等，如果有事發生我會立即幫手。」訪問當天，楊天命明顯疲累，在招牌長髮下更顯憔悴；他直認不諱：「呢段時間邊會瞓得好。」頂着一雙黑眼圈，身心再俱疲，只要一談起警暴，說到這個荒唐政府時，楊天命立馬放下喝着的凍奶茶，眼神一秒變凌厲：「你（政府）用咁嘅手段，香港人係唔會接受！」他，依然是個不好惹的人，火並未因多方打壓而熄滅。
撰文：黃綺敏
攝影：梁正平 廖健昌
發聲的代價，不是人人願付出，有人眼盲有人喪命，數之不盡的他與她被清算，但有港人仍以搵錢至上，在催淚煙下若無其事地安逸過活。「好多人話我好勇敢，我又唔覺得自己勇敢，只係應該要做嘅事就做，其實我邊個都唔係，唔好認為明星行出嚟就好大件事，我哋絕對唔係英雄，只係普通人。最重要係其他200萬同路人都走出嚟，佢哋係英雄，保護孩子嘅人都係英雄。」楊天命聳聳肩說，內地生意沒了就沒了，他不介懷；他着緊的只有眼前這座城市，以及還未能伸張的正義。
「7.21引發咁多咁大嘅力量出嚟，就係因為不公義。」
「我喺facebook打咗篇文，有約一萬個like，立刻有人打嚟騷擾我，叫我收聲，罵我係賣國賊。」那篇文，只是簡單地希望大家多看各方資訊再分析。「有客話我知喺內地網搜尋，楊天命係被標示咗做滋事分子，所以我真係唔夠膽再返內地。內地客要算命，就專程飛到香港。佢哋都問：『師傅你點解要咁啊（發聲）？』我話冇計，個天叫我咁做。」生意事小，關係事大，他較上心的，是跟一班相識多年的朋友政見不合。
「唔好同一班想法不同嘅人見面，因為見面你聽到嗰啲說話會唔開心，你一係怪佢唔夠精明，被某啲消息蒙蔽，又或係覺得佢未夠有良知，我唔想標籤佢哋，所以索性唔見。」他不否認這是逃避，「點解仲要令自己唔開心？呢個世界已經夠多唔開心。」避還避，楊天命無打定輸數，他對修補關係存有希望，「有可能呢件事喺三、四年後，突然有調查出現，好多事情水落石出，對方看法同方向有變時，先做返朋友。」然而政府從不理解獨立調查的重要性。
楊天命再火爆，亦盼望過能和平解決一切，「我對暴力嘅事係絕對唔認同，我本身認為仲有其他辦法。」誰想流血收場？答案是沒有，但最可狠之處是人善被人欺；7.21元朗白衣人無差別襲擊，市民跪地求饒，換來被重拳擊倒的下場。楊天命對此歷歷在目，氣在心頭，「嗰一幕7.21，我先知道我係夠膽同白衣人對抗，如果發生喺我樓下，我會立刻落街，我落去唔係救人，係會拎嘢同佢哋打過，嗰幕真係好離譜。7.21引發咁多咁大嘅力量出嚟，就係因為不公義。」他也由認為有其他辦法，到明白勇武，「因為對方用更加殘忍嘅辦法，更加唔公義嘅辦法，所以我絕對理解（勇武）。」
「希望盡我綿力激勵一班真香港人繼續堅持，追求自己理念。」
訪問期間，楊天命兩度眼泛淚光，一是談到7.21，二是論及勇武的犧牲。「佢哋連遺書都寫定，命都唔要係為咩？最勇武嗰班拉得已拉晒，又或移民去其他地方。」有家歸不得的滋味，上一代人亦嘗過。
移民潮，早在八九民運、天安門事件後發生過。內地再努力抹去六四的存在，也抹不去人們對政權的不安和恐懼；香港大批有能力的中產及專業人士紛紛出走，原名姚偉豪的楊天命，正是其中一員，1992年舉家移民到加拿大。「我喺外國生活咗十年，但其實個心同靈魂永遠都愛香港。」心之所向，身之所往，楊天命2000年隻身回流香港，妻子及兩名兒子則長居加拿大。
「好多人話『師傅，好心你就咪講啦，你表達咩啊？你都有外國護照啦』，我話唔關有冇外國護照事，有梗係可以唔使發聲，話之你哋，但我就係覺得唔公義，一定要講。」曾經移民又回來了，他才深明在外頭做香港人好與壞。這次的社會動盪、暴政下出現的種種苦況，跟六四不遑多讓，而且持續時間更長，但楊天命卻企得更硬：「我冇打算再走，我會堅持，希望盡我綿力激勵一班真香港人繼續堅持，追求自己理念。」
「政府同市民對抗，市民咪行衰運囉。」
「我上年寫香港高官正行好運，非常得到中央照顧，佢哋做咩中央都會被讚揚。」如果他們是為香港謀福祉，港人就有福了，但事實有目共睹，「政府同市民對抗，市民咪行衰運囉。」港府跟主流民意對着幹，早在基建及發展取態上一一體現。
「如果繼續污染香港空氣，繼續胡亂掘路填海，就一定會破壞風水。」他認同香港山多人又多，過往的土地確實要靠填海而來，「但有種事叫過猶不及，填過量就有問題。」對於港府計劃填大嶼山一帶的地方，他這樣看：「根本大部份人都唔覺得要填，好多地方肯收地就起到樓。你（中央）講到咁支持我哋，點解唔用中國政府錢去填？點解要用我哋納稅人嘅錢先？」
「以前海港好闊，稍為填海可以令水流急啲，代表金錢來得較容易，惟當維港越填越窄，水嘅速度越來越快，意指香港易變投機市場，財再唔會流入。」風水佬的話，信不信由你。但聽君這個對樓市的預測，反正我信了。「好多人幫襯我睇流年運程，差不多100%都係問如果走的話，去邊個方位較旺？我就喺度諗，如果呢班人移民走晒，本身層樓會點處理？一係租畀人，一係賣畀人。」所以他認為有部份單位會在今年出貨，樓價有機會回落，租金亦有可能下調。現時在香港沒有物業的他指自己也在靜候時機，「我都係卜卦問個天，天都叫我暫時唔好入市。」
「變幻才是永恒，呢個世界係不停在變，算命嘅原因係咩？係算到你本身條命有咩界限，但最重要係唔好認命，我哋唔要認命。」知命不認命，這非愚蠢，而是在各種「不可能」中尋找「可能」，從而在失敗中進步和改善，楊天命如是說。