【本報訊】港股鼠年開市三日累挫超過1,600點，因疫情而推遲開市的A股和港股通今日復市，證券人士一致預料A股大跌在望，亦拖累本周港股下跌；但認為本周港股會「喘定啲」，跌幅較上周收窄，26000點或守得住。
中民證券（香港）研究部董事黃偉豪表示，「上周A股休市，外資惟有喺港股市場同外圍市場沽貨，做返個對沖；但今個星期A股復市，上述情況少咗，預期港股會喘定少少，跌幅唔會好似上周咁大」。黃偉豪預料，恒指26000點有支持。
黃偉豪認為，雖然A股復市插水5、6%屬「走唔甩」，對港股會有拖累，但人行復市前加大逆回購規模，市場亦預期今年會實施多次降準，「所以A股復市整體對港股係偏正面，起碼今個星期跌幅冇咁大」。
兩萬六有支持
一向較不受疫情影響的科網股「ATM」組合，上周因股市跌勢急促逼得好友棄守。黃偉豪指之前累計升幅多，憂慮疫情而沽貨亦屬正常，不過與股票基本面無關，「科網股業績增長不俗，建議守住。中長線而言應趁低吸納」。
宏匯資產管理董事及投資策略總監林嘉麒則指，A股復市會拖累港股「再跌多一陣」，料今日港股低開，下試26000點；他建議投資者不宜入市，「醫療專家都話現在只是觀察期，等多兩星期先知結果係點，所以暫時持現金會安全啲。等股市回穩，低位會有更多選擇」。
林嘉麒提醒，現階段已炒上的概念股表現較疲弱，建議可避則避，「細價醫藥股話會研發抗疫新藥，但起碼都要一年時間以上。另外，雖然疫情嚴重，但死亡人數不算多，殯儀股基本面亦弱。投資者都係忍手較好」。