大家喺歐聯分組賽已經見識過挪威新星艾寧夏蘭特嘅威力，點知佢嚟到德甲仲威，加盟多蒙特踢咗三場聯賽，只係踢咗136分鐘竟然入咗7球咁多，暫時冬季最佳收購唔係佢係邊個？
首次正選又省兩粒
多蒙特喺上周六場德甲，主場5:0大炒柏林聯，上兩場後備上陣都入波嘅艾寧夏蘭特，今場首次擔正又省兩粒，果然冇令大家失望。佢喺前線拍檔查頓辛祖幫球隊打開紀錄只係五分鐘就入波，踢到下半場68分鐘，佢接應直線殺入禁區被對方門將撲跌博到12碼，由隊長馬高列奧斯射入；當韋素之後再入一球後，夏蘭特再喺76分鐘接應祖利安白蘭特助攻射入今場第2球，幫球隊埋齋贏5:0。佢賽後受訪就話好享受喺多蒙特主場球迷面前入波，又話估唔到嚟德甲後可以係咁入波。
夏蘭特踢3場射8腳入成7球，高效到嚇死人，唔怪得球會可以咁放心放走西班牙前鋒柏高艾卡沙。另外，佢嘅轉會費只係2,000萬歐元，好多人都話同樣喺冬窗對佢有興趣嘅曼聯走寶。其實曼聯又唔係出唔起錢嘅，不過紅魔同佢經理人拉奧拿因為保羅普巴嘅問題而鬧到好僵，所以先冇簽到佢。無論點都好，多蒙特喺佢加入後，歇冬後已經三連勝，仲要連續3場都單場入5球，喺聯賽榜過咗慕遜加柏上第三。
拜仁三子同樣火熱
至於拜仁慕尼黑亦同樣錄得歇冬後三連勝，作客3:1贏緬恩斯，而且多蒙特有夏蘭特同辛祖連續三場有波入，佢哋亦有羅拔利雲度夫斯基、湯馬士梅拿同堤亞高艾簡達拿三位主將，同樣連續三場都建功，而且今輪過後反壓RB萊比錫一分上榜首。講開RB萊比錫，本來歇冬前領先拜仁四分，但今輪逼和慕遜加柏後已經連續兩場失分，射手迪姆華拿兩場都食白果。