武漢肺炎疫情擴散到全球，美國都中招，仲拒絕最近去過或來自中國嘅所有訪客入境。有網民發現過去多次「神預言」嘅美國長壽卡通《阿森一族》原來早喺27年前播出嘅一集，已「預言」出現由亞洲傳入美國嘅疫症，然後大規模擴散，呢集內容嘅病毒名係「大阪流感」（Osaka flu）。有網民為咗更貼近現實，刻意改圖令劇情中嘅病毒名變為「冠狀病毒」，令到大家更有「共鳴」，獲得唔少網民轉發。
《阿森一族》1993年第4季第21集《Marge in Chains》劇情內容，同現時疫情全球擴散情況類似，該集講述一個喺日本患上「大阪流感」嘅工人將榨汁機入箱時向紙箱咳嗽，病毒隨包裹寄送到美國斯普林菲爾德（Springfield），包括主角荷馬在內嘅大批市民打開包裹後就被飄到空氣嘅病毒感染，然後病毒再經空氣隨處飄，造成300幾宗感染個案，相信美國人睇到呢個數字都巧京京。