反修例運動惹火人物、立法會議員何君堯名下愛駒「天祿」自動「禁賽」多月後，何已完終於唔玩，退出呢隻馬嘅馬主名單；原本天祿由何偉誠、李星強及何已完三人合夥擁有，𠵱家只剩下前兩者。
天祿呢匹四歲澳洲馬喺香港出賽，六戰兩勝，已贏得187萬獎金，原本可以扶搖直上，但去年9月18日準備喺跑馬地賽事出賽前，有網民號召入場「探望」何已完同「支持」天祿，令馬會喺開賽前六粒鐘緊急宣佈，為確保人同馬安全，取消當晚跑馬地夜馬全部賽事，係63年嚟首次因為政治問題無法「馬照跑」。何已完事後曾話馬會唔應該向惡勢力低頭，但翌日佢發聲明話喺香港政局平息前，天祿暫停出賽。
天祿自動禁賽後，被練馬師告東尼安排運返從化馬場「放假」，喺當地維持基本操練以保持運動量；現時何已完退出馬主名單，預期天祿好快可以「銷假」返港出賽。