隸屬消防處的救護員在接送武漢肺炎確診或疑似個案時才能穿上PPE，遇上從999熱線接報的病人個案時只能戴口罩與眼罩保護，「每日大約10轉call，但𠵱家PPE數量唔夠轉轉call都着」，前線救護員鳴仔（化名）說。
鳴仔形容每次接call如抽生死籤，因很多病人致電999時不會如實說出曾否到訪內地或病徵，「好多時上到去問多幾句先肯講返過大陸，有時甚至鬧返我哋問咁多做乜，其實救護員唔止係搬運工，係有醫療作用，會有藥或者措施幫到病人」。
鳴仔說話時翻動着皮膚爆拆的手，「可能因為成日用消毒液，搽極cream都好乾」，但能保護他的除了外科口罩就是消毒洗手液。然而，由於每次上車交收病人就要更換外科口罩，供應捉襟見肘，「存量基本只頂到十日八日，我嘅分局應該剩返1,000個，N95暫時唔係轉轉戴，消耗量少啲」。
運疑染疫者後 人車消毒
他指有同事曾在不知情下沒穿保護衣運送曾到訪武漢的病人，事後十分擔心，但消防處現時沒隔離措施，「救護車入面係循環風，我哋同患者同處密閉空間其實好危險。𠵱家運過疑似病人嘅救護員係冇14日隔離設施，因好耐以嚟救護都唔夠人用，甚至要『賣血』（到其他分局加班賺錢）」。
鳴仔說運送完疑似個案後會連人帶車到最近的救護站消毒，清潔車廂並更換制服才繼續工作，慎重起見他收工後會先在站內洗澡，回家後又再洗澡，但無論如何預防，內地旅客與隱形病人還是源源不絕來港，「𠵱家已經係人傳人，封關已經遲咗，係好過冇咋，全面封關、禁止內地旅客到訪係最徹底方法，同埋曾到內地嘅香港人就自我隔離14日」。
最叫他生氣的是在疫症爆發之初，衞生署長陳漢儀宣稱若無病徵不必戴口罩，他認為是出於政治考慮，「陳漢儀本身係醫生，竟然叫人唔好戴口罩，幾多老人家淨係睇CCTVB會信以為真，究竟人命大定政治大？」