香港以前電影業蓬勃，就連傳媒都好捨得使錢，派人去外地採訪大型影展或電影節。記得有一年，姐匙去外地做影展，當時內地電影業起飛，唔少內地電影同演員都有去參與，姐匙聽過當時仲未紅嘅內地演員「西西里」，品行好差，估唔到佢家人都係咁差。
影展期間，喺街上見到藝人或記者唔出奇，因為通街都係。不過當年有一日，姐匙同一班行家行去做採訪，呢個活動都有唔少中港台影星出席，當姐匙一行人行行吓，見到西西里嘅媽媽，自然反應就係舉機影相，點知人哋阿媽竟然向成班記者爆粗，仲要講啲極低俗嘅粗口，問候家人。當時成班記者都好愕然，但就繼續影西西里媽，而佢就被閃燈閃到睇唔到路。其實西西里媽即使幾唔高興都好，可以好聲好氣同大家溝通，而唔係一嚟就爆粗，唔單止有失斯文，仲令個女丟臉。後來姐匙有位同事去內地，遇到西西里嘅哥哥，點知對方仲對記者郁手。阿媽講粗口、阿哥又動粗，令姐匙諗起當年賭王嘅金句，乜嘢叫做「質地唔好」。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。