原名馮兆華的華戈，不少經典電影如《跛豪》、《逃學威龍》、《行運一條龍》及《黑社會以和為貴》的海報都由他親手題字。但原來，華戈一手流利書法，竟是自學成功，他在80年代由一名電器工半途出家，入行的同時，見證港片的騰飛，他說︰「1979年嚟香港幫親戚打工送吓電器、駁吓線。開頭都係玩票性質幫人寫吓招牌，有人介紹寫白色招牌，都喺低下層車房、廉租屋小店寫。價錢都係隨意畀，啲人話：『30蚊？』我話得得得，有啲畀80蚊，梗係好啦。嗰陣人工都係30蚊一日。住嘅係板間房。」
最後華戈決定辭工自尋我路：一個垃圾站撿來的書包、白飯魚、幾支油掃同油漆，開始「cold-call」生涯，他笑說︰「咪周圍去尋尋覓覓，今日去黃大仙、聽日咪去九龍城，不過成日俾警察搜身。因為成身油好似瘀血咁，油漆柄似槍柄。」華戈自言要養妻活兒，辛苦在所不免。
華戈其後在書法行漸漸打出名堂，轉捩點是在砵蘭街頂下一檔書法檔，他說︰「其實都係街邊檔，出咗部和記BB機已經好奢侈，飲茶放枱面『嘟嘟嘟』，係身份像徵。」位處三山五嶽之地，亦是電影公司取材攞靈感的地方，不時有幕後行過，問華戈可否代道具題字，他一口答應，自此跟影圈結下不解緣，華戈說︰「啲人抬啲道具嚟寫招牌，寫完話『掂喎』，跟手就請我去片場即場寫，我話仲方便，唔使搬嚟搬去。」
同杜琪峯最夾
由寫道具到為電影海報題名，都沒有考起華戈，惟獨要應付不同導演，確實要一點技巧，他笑說︰「嗰時徐克、黃百鳴、王晶、杜琪峯、麥當雄兄弟、李修賢都係我客仔。《2046》王家衛叫我去澳門，幫成條古裝街寫招牌。王家衛係好認真、要求好高嘅人，不過佢不厭其煩，重重複複處事方式未必啱我，所以之後《一代宗師》請我去開平開工，我都冇應承。」華戈口中杜sir利落性格就跟自己匹配︰「大家夾慣咗唔使諗，寫《黑社會以和為貴》、去北京寫《三人行》都信晒我。王晶、黃百鳴亦都好爽脆。」
華戈創業的書法檔仍然保留，不過已有八年沒有開檔，只農曆年時給學生替人免費寫揮春，他說︰「好多人靜雞雞寫就得，當住面寫就甩皮甩骨。」