鄭欣宜與英健朗（小占）近日為ViuTV節目《最愛母飯開》做主持，到訪不同家庭探訪多位母親，並嚐嚐各媽媽的住家菜，欣宜自小父母離異，跟媽咪肥姐沈殿霞同住，卻主要由婆婆湊大，難怪欣宜受訪時稱：「任何人睇個節目都會諗返起自己屋企，每集我講飯後感，通常都忍唔住喊。」
撰文：張明
攝影：沈健程
鄭欣宜聯同英健朗（小占）為ViuTV最新節目《最愛母飯開》擔任主持，每集到訪不同家庭，一嚐住家媽媽的巧手菜，並聆聽母親們在擔當家庭角色中的種種困難。欣宜指今次節目主旨並非只為美食，而是媽媽們在家中的付出，欣宜表示人越大越掛念住家飯，她說：「屋企飯味係唔同啲，節目中其他家庭成員努力製造溫馨，珍惜同屋企人一齊嘅時間。我最掛住係婆婆煮嘅美食，但一同老人家講鍾意食一樣嘢，佢真係每餐都煮，我好憎洋葱豬扒，好討厭西洋菜湯，餐餐食都會厭，但我好高興能夠成功做到婆婆包餃子嘅味道。」
看到自己影子
欣宜自小父母離異，沒有跟爸爸鄭少秋而跟媽咪肥姐沈殿霞同住，卻主要由婆婆湊大，她說：「任何人睇個節目，都會諗返起自己屋企，尤其係我婆婆，因為係婆婆湊大我，有一個特別椎心位，每集我會講飯後感，通常都忍唔住喊。拍之前都驚集集忍唔住，特別一集講行內一位單親媽媽，同小朋友嘅互動，我喺小朋友身上睇到好多我嘅影子。」
首次擔任主持的欣宜表示，過往認為做主持要轉數快，口才要叻，中文要好，而她不懂製造氣氛，幸好拍攝過程勵志，自己亦有思考自己應該用甚麼方式繼續自己的娛樂事業。節目中每集的媽媽都煮得一手好菜式，欣宜說：「有個媽媽做燒腩仔同叉燒畀我哋食，我返屋企試整，最後食到朋友肚屙，第二次整，朋友都好畀面食晒。」欣宜指家庭主婦的能力並不比任何人遜色，她們的工作並非人人能做到，欣宜說：「我都想做家庭主婦，但我太愛我嘅工作，我會考慮兩邊兼顧。」
而小占在最尾一集錄影爆喊，他解釋見到一家年紀較大的家庭成員齊人食飯，覺得感動亦不是必然，他說：「朋友知我係精神科護士，心理上有問題都會問我意見，𠵱家好多一家人政見唔同，食飯機會少咗，見面好似仇人咁，大家唔應該破壞家人關係。」