無綫、港台及商台等因武漢肺炎肆虐宣佈取消新春團拜，惟獨亞視「無畏無懼」昨日依舊舉行。亞視近年屢傳財困，非執行董事兼聯席主席賴彩雲昨日竟大手筆宣佈捐出1,000萬人民幣助武漢抗疫，並捐20萬個口罩予香港市民，副總裁林文龍更稱不設預算大改革，誓要大家對亞視另眼相看。
亞視昨日如常在大埔總台舉行初七人日團拜，出席的台前幕後一律都戴上口罩。林文龍以亞洲心動娛樂副總裁身份上台致辭，全程戴住口罩的他祝福大家身體健康：「𠵱家疫情咁嚴峻，感謝大家今日嚟，特別感謝傳媒咁勇敢、大膽參與。」提到來年展望，林文龍希望亞視台前幕後上下一心，誓要令觀眾對他們另眼相看，最後他有感而發：「希望早日除低口罩，輕鬆自在，呼吸每一口空氣。」
派給有需要港人
大會司儀陳佩思未有戴口罩上台，亞洲電視控股執行董事兼聯席主席鄧俊杰，於台上致詞時也除下口罩，他寄語大家注重身體和衞生：「少啲出去行走，多啲留喺屋企。希望有林文龍嘅帶領下，亞視可以重振輝煌。」至於因事未能出席的亞視非執行董事兼聯席主席賴彩雲，專程拍攝短片向眾人拜年，片段中她透露已安排20萬個口罩，將於下星期送到香港，並會捐出1,000萬人民幣到武漢幫助抗疫工作，提供合適物資。
由於受疫情影響，林文龍坦認工作的確有影響，但期望上下團結面對：「今年新年氣氛唔同哂，只要做好基本防禦，任何困難都可以衝破。我哋都盡少少綿力去幫內地同胞，知道香港人缺乏口罩，賴主席都撲咗20萬個返嚟，會派畀有需要嘅香港人，亞視員工當然亦係香港人啦。」
不設預算大改革
林文龍透露亞視將會進行重整，大埔總台及辦公室均會裝修：「我同員工暫時會留喺屋企工作，或者喺出面開會。要閂嘅部門我哋都閂晒，今次裝修大約要3、4個月，6月28日我哋會正式宣佈亞視嘅新形象同計劃。」至於重組架構預算多少經費？林文龍直言任何需要改進的地方都會做，不設預算框架：「炒人唔係我哋放喺第一位嘅工作，只要有工作能力、工種又配合到我哋計劃嘅就會留低，同事要對自己工作能力有信心。」
至於私人方面，林文龍表示農曆年取消所有拜年活動：「淨係返咗屋企拜年，之後留喺屋企。我今朝都喺花園曬自己曬咗兩個鐘，再諗吓未來嘅工作。」近日全城瘋搶口罩及清潔消毒用品，林文龍讚老婆郭可盈很細心：「佢好早就入咗啲貨，所以唔使擔心。希望疫情快啲解決，香港同亞視都可以煥然一新，吸一口新鮮空氣係基本，搞到今日咁都幾難堪，祝香港早日康復。」雖然新年活動取消，但林文龍仍準備6位數字派利是。
採訪：盧妹
攝影：沈健程
