最近武漢肺炎肆虐，人人自危，就連一班喺中超球會效力嘅外援都醞釀逃亡，亦有原本打算轉戰中超嘅世界級球星臨時轉軚，今次疫情連中國球壇都搞到立立亂！
保連奴：恒大話唔使驚
效力廣州恒大嘅巴西中場荷西保連奴職業生涯兩次效力恒大，今次武漢肺炎搞到佢考慮再次離開中國，近日佢接受西班牙傳媒訪問嗰陣，就透露家陣喺內地嘅情況：「球會叫我盡量唔好外出，雖然中超聯賽暫時唔會踢住，不過我哋要參加亞冠盃，所以球隊要繼續練習。其實我有考慮離開中國，不過球會就同我講話我哋好安全，叫我保持冷靜。」保連奴就話未見行動，但其他唔少中超球星已經密謀回流歐洲，有部份就快成事，好似大連一方嘅恩歷克卡拉斯高已準備好重返馬德里體育會，佢嘅隊友荷西朗頓亦受到曼聯垂青，而北京國安嘅前維拉利爾射手巴卡保就同巴塞隆拿有接觸，仲有上海上港嘅阿拿奧杜域，由韋斯咸過檔僅半年就想走人。
除咗球星逃亡之外，有原本打算去中超掘金嘅歐洲球星亦都大打退堂鼓，家陣效力緊意甲羅馬嘅阿根廷中場柏尼托尼據報已經同一支中超球會達成協議，準備以高達300萬歐元嘅年薪加盟，不過因為中國疫情同中超延遲開季嘅影響，呢宗轉會最終告吹。今次中超經武漢肺炎一役之後，真係隨時有機會星散呀。
耶耶打倒昨日的我
效力緊青島黃海嘅耶耶托尼之前仲非常有心，拍咗段短片為受疫情影響嘅中國球迷打氣，不過英國天空體育就話Yaya同費蘭尼等一班中超外援，都有可能尋求離開中超轉戰其他聯賽，唔知Yaya最後會唔會真係打倒昨日嘅自己呢？