【肺炎大爆發】
【本報訊】黃藍是政見，黑白是良知，抗疫亦然。從泰國訂購大量口罩助港人抗疫的阿布泰國生活百貨老闆林景楠，前日因口罩沽清，被撲空的大媽大叔指罵，好心換來被批鬥，他昨受訪時直言不介意，甚至樂見藍絲幫襯，「我想佢買，起碼佢肯戴，喺抗疫上有盡一份力。」口罩僧多粥少，他指市民保護裝備不足，炮轟政府對封關要求無動於衷；他憶述送口罩到分店時，有市民向他哭求口罩，「保護市民健康安全明明係政府責任，點解會係由市民去求一個商人？」
記者：陳珏明
港人自求多福，連日漏夜排隊搶購口罩，但結果一罩難求，同場加演大媽大叔包圍口罩售罄的店舖，更踢閘或指罵店員老闆洩忿，林景楠周三下午成為其中一個受害人，一度被困荷里活廣場分店，要在社交網出帖求救。
天災加人禍 全球搶口罩
他之後向在場市民發言稱：「我盡我最大努力去搵最多口罩都係唔會夠大家用，我係幫唔到大家，幫到今日聽日已經幫唔到，幫到大家只係政府，我們要求要立即封鎖邊境，係唯一可以解決現時問題嘅方法。」隨即換來現場大量掌聲。
事隔一天，他接受本報訪問時透露，其實早在一月初內地出現不知名肺炎時，已覺察港人需要口罩，由於他公司專營泰國產品，故當地成為主要搜購地點，「最初仲可以船運，但新年前已經唔得要寄飛機，入貨急咗好多」。
他指，這次口罩荒源於天災人禍結合，先有澳洲山火及菲律賓火山爆發，兩地民眾急需口罩，曼谷又遇上嚴重霧霾，當地口罩需求急增，加上內地爆發疫症，連同農曆新年工廠停工，終令供應鏈崩潰，「前日我有7,000盒口罩，即係35萬個，但講緊700幾萬市民，20人先分到一個，但只夠用一日」，故他早料到開售會引來混亂，「都冇怪指罵嘅人，佔領後慣咗呢啲批鬥，就算佢係藍絲嚟買口罩，我好歡迎呀，抗疫是良知，起碼佢知要戴口罩，有份喺抗疫上出一分力」。
林景楠又解釋為何預留口罩給醫護人員及海關等前線人員，「我哋收到好多查詢話政府唔夠畀佢哋，咁佢哋病咗邊個抗疫？當然要先保護佢哋」。
醫護海關優先 支援抗疫
他最不滿的是政府至今對全面封關訴求無動於衷，「已經講咗有隱性患者，仲中門大開？市民口罩又唔夠，咁只會造成社區爆發，沙士時雖然我仲細但都有記憶，唔通啲官員忘記晒？」強調全面封關是眼前當務之急。
政府抗疫表現引來民憤，他亦無奈分享一個當天親自送口罩到分店時遇上的經歷，當時有一名市民因買不到口罩而向他哭求，「佢話屋企一個口罩都冇，我真係幫唔到，只能夠話佢知之後（口罩送貨）去邊間舖，佢就飛的士去，最後見到佢都買到，但點解係要由一個市民去求個商人？保護市民健康安全明明係政府責任！所有嘢都係離唔開政治，但仲有乜方法係可以令呢個政府以市民為優先？」