廖碧兒近年除了幕前演出，亦涉足酒的行業及其他投資，十足女強人一樣，但感情生活多年來一直交白卷，真命天子尚未出現。剛在本月初度過41歲生日的廖碧兒，坦言想找到合適的另一半，因此即使今年會返加拿大過農曆新年，但為行桃花運，她笑言會在當地努力尋找真桃花，希望成功覓得真姻緣。
隨時Ready
當年憑選美入行的廖碧兒，眨眼在娛樂圈已經20年，多年來她在幕前、生意、投資等多方面發展頭頭是道，可惜感情路上，目前卻依然空白。鬼妹仔的廖碧兒每年農曆新年會跟隨家人做足傳統習俗，包括在家中放全盒、擺鯉魚年糕至發霉，同時會穿新的紅底褲寓意好運來臨，她說：「紅色底褲媽咪會幫我買，新年我好鍾意買花，當我買一棵好靚嘅桃花，老闆就會送五顏六色嘅劍蘭，我每年都會同啲狗仔喺桃花前齊齊影相。」
雖然廖碧兒今年返加拿大過年，但為了行正桃花運，必須想盡辦法在當地買桃花，她笑說：「加拿大比較少，佢哋擺蘭花多，又唔可以喺香港帶過去，或者買棵膠嘅。唔係我唔想，不過其實都唔一定新年先搵（另一半）嘅，我隨時ready，搵段真嘅姻緣。」一直有指廖碧兒跟富二代舊愛盧啟賢復合，但一提到對方，廖碧兒甜笑拒絕回應：「呢個唔講嘞。」
多見家人
踏入鼠年，屬馬的廖碧兒沖太歲，有指人生大事上均可能有很大的變化，她表示：「我唔知，唔係好有研究，我淨係對星座有啲研究，因為外國人係講星座嘅，呢啲傳統嘅唔係太清楚，本身我連屬乜都唔知道。不過做咗呢行，都有經理人幫我去做（拜太歲）。」
單身的廖碧兒會否希望最大的變化是拍拖、結婚及生小孩？她笑說：「其實近呢一、兩年嘅改變都幾好呀，無論係酒行業嘅嘢，又多咗見我屋企人，我希望最大嘅改變係世界和平，大家都安安全全返屋企，係最重要，因為我屋企人由上年8月到𠵱家都未返過嚟屋企，所以我叫佢哋花多啲時間陪我公公，時間喺呢一刻係最珍貴嘅。」
採訪：羅慧敏
攝影：林德雄
化妝：Ivan Lee
髮型：Chris Cheng of iL COLPO Platinum
場地提供：McSorley's Brewhouse & Grill