黃祥興同老婆Peggy結婚7年，育有兩名仔女，早前Peggy再度懷孕，噚日終順利誕下一子，組成五口之家，可喜可賀！今次Peggy選擇剖腹生產，黃祥興亦決定入產房陪伴老婆以及親手剪臍帶，佢話：「BB重6磅尾，母子都好健康，今次入產房同第一、二次感覺好唔同，頭兩次覺得媽媽係主角，好關心媽媽嘅狀態，今次可能年紀大咗，好期待第三個BB，當然都冇忽略媽媽，會好關心BB幾點出世、如何出世，又會留意醫生點開刀，到醫生話BB出世喇，我就幫手剪臍帶，整個過程都好順利，覺得生命好重要，我哋做父母會俾最好嘅嘢小朋友，希望小朋友快高長大。」
忍痛退出餐廳生意
鑑於近日武漢新型肺炎肆虐，黃祥興不忘提醒大家要注意個人衞生，自己同兩個小朋友都會做足預防措施先去醫院探望老婆同抱BB，入屋前亦會替兩個小朋友徹底消毒，以免將細菌帶返屋企。黃祥興表示，嚟緊只會自己去醫院照顧太太，一對仔女留喺屋企以策安全，佢話：「最近收到好多朋友祝福同問候，我都叫佢哋電話祝賀可以，唔使專程嚟醫院，感謝大家嘅關心。」而黃祥興為咗投放更多時間照顧家人以及幕前工作，決定忍痛退出法國餐廳，希望鼠年能夠有一個新開始，佢亦趁住噚日係年初六，祝福大家身體健康、心想事成！
撰文：馮仁昭