外國勢力人士之中，最風涼最勢利莫過於美國總統，自己面臨彈劾還有興致說三道四，高度讚揚中國處理武漢肺炎手法，大言不慚「欣賞中國的努力和透明度」，並且「代表美國人民感謝習主席」，也不怕敏感的耳朵一聽就知道話中有骨。何謂一啖砂糖一啖屎，此乃新鮮熱辣示範，雖然後來補充美國樂意提供援助，晨早講咗「你哋好叻呀，做得好好呀」，即係話使鬼我哋做架樑插手，問心無愧各家自掃門前雪。大話精臭名遠播，當然毋庸嚴肅對待，但世界衛生組織不是一個具公信力的機構嗎，早前口輕輕評估已無限升溫的疫情為「中等」，已經教大家面面相覷，前幾日那個名叫譚德塞的總幹事親赴中國考察，面聖時居然出盡吃奶的力擦鞋，什麼「中國政府在疫情面前展現出堅定的政治決心，採取及時有力舉措」，什麼「認同中國公開透明發佈訊息」，唔知係唔係食北京填鴨食懵咗，簡直令人髮指。他還不主張外國政府撤僑，「沒有必要過度反應」，以後有乜冬瓜豆腐被炒魷，投靠林鄭麾下必定一拍即合，和蔣麗芸合體上電視主持飲食節目，教觀眾如何清蒸一次性口罩再生重用，年度最環保金紫荊大獎包冇走雞。
英明的習主席稱武肺為「魔鬼」，揚言「中國不能讓魔鬼藏匿」，林鄭聽見，唔知個心有冇當堂離一離──吓？佢根本冇心，離鬼離馬咩？噢對唔住囉，恕我睇得《怪醫D老篤》一類電影太多，以為禽獸都會講人話。主席向解放軍訓話，要他們「聞令而動，勇挑重擔，敢打硬仗」，使我茅塞頓開：原來病毒這個敵人要靠軍隊打，醫護人員可以休息了。