特首林鄭月娥任內除咗搞出反送中運動，佢處理武漢肺炎嘅手法，亦差到連著名堪輿學家楊天命都忍唔住冒住風險向中共國家主席習近平上書進諫，要求盡快炒林鄭魷魚。
指八字屬「傷官格」
楊師傅以題為〈致習近平總書記的一封信〉喺facebook發帖，下款為「一位略懂術數的市民」指，林鄭嘅八字為丁酉年，乙巳月，乙酉日，正正係「傷官格」，亦代表「剋夫命」，從命理角度睇，亦包含「剋住上司」的意象，指林鄭做特首前，每個直屬上司一係身體出事，一係難逃下台命運，更有人承受牢獄之災，「這樣驚人的成績，怎可能是巧合？」
佢又幫習近平重溫林鄭過人「往績」，包括佢擔任特首後，中國喺中美貿易戰進退失據、中國爆發鼠疫，台灣、香港問題更日益發酵，近日仲有埋武漢肺炎，並指林鄭治下親手推動香港人進入「和勇不分」狀態，處理香港疫情方法更令大批「藍絲」不滿，勸戒指：「再這樣下去，香港從『和勇不分』變成『黃藍不分』，恐怕指日可待！」指習大大唔信佢呢番話都唔緊要，但可以問下身邊嘅命理高手、國師意見，「相信他們一定會認同我所說的話——此人實在不可留！」
楊師傅嘅精闢分析獲網民激讚，不足一日已有逾2萬幾人讚好同逾萬人分享，當中亦有人嫌楊師傅封信有不足，就係竟然無將信中所附嘅林鄭年輕相片打格，亦有網友建議楊師傅喺微博用簡體字發表信件，但楊師傅就話個人微博已被封鎖咗。
李八方