民望低處未算低嘅林鄭政府，唔知係咪嫌現時藍絲盲撐政府專頁唔夠多？舊年12月16日就突然整咗個名為「添馬台」嘅facebook專頁出嚟，話要「提供有關近日香港社會事件的資料，以正視聽」。呢個專頁12月設立至今，搵嚟唔少無乜香港人噏得出個名、甚少公開蒲頭嘅政治助理拍片撐警撐政府，喺必要時發「澄清」為政府消毒。事隔一個月多，專頁讚好人數仍不足5,000人，但政府用咗26,000元公帑推廣帖文，換言之每個like值$5.2。
八方問過政府新聞處，呢個專頁究竟用咗幾多人手同公帑？新聞處回覆時就話，政府透過調撥內部資源，包括政府新聞處現有人手，設立同管理「添馬台」面書專頁，不涉及額外資源，又話推出至今，政府新聞處用咗約26,000元公帑推廣帖文；仲聲稱專頁嘅瀏覽人數「總接觸人數約為80萬面書用戶」。
八方早排亦發現咗一個名為「Save HK」嘅藍絲群組，當中除咗大量盲目撐警、撐大陸同香港政府嘅帖文，更將一名喺「愛國」傳媒攝記老屈為《蘋果》同事，不斷批評佢專影藍絲同警察大頭相，果然係人一藍，腦便殘。