香港早排抗爭運動，不時幫一啲藍店或中資企業「裝修」，呢種風氣其實喺外國一樣唔少，之前意甲出現拿玻里兵變，有球員屋企俾激進球迷入屋破壞，家陣喺英國曼徹斯特，一向得唔到曼聯球迷歡心嘅執行副主席活華特，禮拜二喺柴郡嘅豪宅亦俾一班魔迷包圍，仲喺大閘門口放煙霧彈同煙花。
網上片段見到，大約20至30名紅魔球迷去到活華特嘅豪宅門口抗議，有人揸住有紅色火光嘅物體掟向鐵閘，然後其他包圍嘅人士就唱歌同埋嗌口號，甚至有人透過大門入口嘅對講機，咒佢快啲死。據講呢班球迷係嚟自Men In Black嘅極端球迷組織，一早睇呢位紅魔高層唔順眼，好彩係活華特同家人都唔喺屋入面。
將被終身禁足奧脫福
紅魔事後發聲明譴責呢班球迷：「球迷表達意見係一回事，造成刑事毀壞同意圖傷害他人性命又係另一回事，唔係藉口。我哋會同警方合作，搵出呢班襲擊者，任何參與呢件事嘅人都會被球會終身禁止進入奧脫福，亦會被檢控。」喺英國BBC擔任旁述嘅英格蘭名宿連尼加，亦喺twitter指摘球迷嘅行為令佢覺得嘔心。
不過，好似香港情況咁，球迷要用激進手法去表達訴求，其實都係忍咗你班「高官」好耐。自從活華特全權掌管轉會事務後，曼聯真係冇邊單收購係成功，成績亦冇好過，仲要不斷做水魚，係咁送錢畀其他球會，淨係簽番一個自家青訓保羅普巴，就破晒球會紀錄，點知呢位身價高達8,900萬鎊嘅球星回巢後，呢幾年冇踢過邊腳好波，仲不斷跳草裙舞。另外，今夏用8,000萬鎊簽哈利馬古尼，雖然呢位新隊長表現唔太差，但紅魔後防又唔見得比之前穩陣好多，其他好似迪馬利亞、迪比同阿歷斯山齊士呢啲已走之人，更加唔好講，所以好難怪一班魔迷嬲到爆煲，先嚟搞你屋企。
傳費南迪斯等做體測
只不過魔迷「裝修」活華特屋企同時，原來曼聯已傳終於傾掂波基斯費南迪斯單交易。一個禮拜前，仲話因為曼聯孤寒唔肯滿足士砵亭6,800萬鎊（約6.8億港元）嘅開價，但因為巴塞隆拿突然中途殺出想截糊，逼使曼聯唔再討價還價，承諾會先付上4,700萬鎊嘅首期轉會費，加上850萬鎊嘅球員出場費同1,270萬鎊嘅特定條件獎金，將呢位葡萄牙中場簽下，對方就會周三飛去曼市體測，唔知魔迷滿唔滿意，定係覺得球會又被人搵笨呢？