恭喜！恭喜！71歲嘅歌神許冠傑再做爺爺，細仔許懷谷噚日喺社交平台宣佈湊成個「好」字，小公主Leah出世。許懷谷好興奮咁用英文留言：「向全世界介紹我們的baby girl Leah Hui。她很安全，隨時可以走向世界。太太為順利誕下健康寶寶而感到自豪，讓大哥哥Tyler慢慢適應這個妹妹。」
肥嘟嘟似爸爸
再做爸爸嘅許懷谷不忘同大家分享，同生命中兩個重要女人嘅合照。啱啱生完嘅許太林鈺雯（Ida）精神好好，睇嚟佢哋對於要重新照顧初生BB嘅生活，適應得好快。而許家新成員Leah面珠肥嘟嘟好似爸爸，鼻高高同雙眼皮就似足媽咪，佢雖然係初生BB，但已經好多頭髮，面仔同嘴仔都紅粉緋緋，真係非常可愛。
許懷谷同任職會計師嘅太太Ida拍拖四年之後，2009年喺清水灣遊艇會註冊兼舉行婚宴，好快就為許家添咗個男孫Tyler，𠵱家有埋小公主Leah，啱啱好三年抱兩，而許懷谷嘅哥哥許懷欣亦有一對孖仔。Leah係歌神嘅第一個孫女，相信必定會被爺爺錫到燶，成為許家嘅小寵兒。
撰文：馮仁昭