【娛樂人物】曾是著名DJ的洪朝豐在2017年先後確診患舌癌及淋巴癌,結果要割脷保命,經歷巨變,他一度意志消沉和厭世,但隨着四處遊歷尋回生命意義。剛在月初踏入60歲的洪朝豐領悟出「喜悅自己、有益於人」,生命原來這麼簡單,自然活得開心。踏入鼠年,他希望「長命百二歲」,有更多時間實踐人生計劃。
撰文:魯吉
攝影:陳俊強
洪朝豐剛在本月初慶祝60大壽,鼠年前夕已飛到清邁展開人生第四度短期出家,以不一樣的經歷迎接新一年的來臨。洪朝豐日前接受《蘋果》專訪,即席以書法寫出他生日和新年願望,2017年先後確診患舌癌及淋巴癌的他,現在身體雖已經康復,但洪朝豐祈望新一年有更健康的身體去迎接新一段人生里程,所以他特別寫上「長命百二歲」和「龍馬精神」送給自己,也送給身邊至親和好友。洪朝豐直言近40年沒有拿起毛筆寫書法,當日他再次執起毛筆,依然揮灑自如,洪朝豐笑說:「讀中學時有兩年學書法,會考有考寫書法同素描,攞C,但過去40多年好少執筆喇。」
唔捨得死
談到願望之一「長命百二歲」,洪朝豐說:「我哋成日講長命百歲,我呢個比長命百歲仲犀利,長命百二歲,個古仔係半年前我個人仲唔係好開心,睇前面嘅路睇得唔係好清楚,唔係好知自己做緊乜嘢,感覺自己仲有少少厭世,生命冇乜方向,未去到厭惡咁誇張,但好似冇乜特別意思、冇特別意義。」不過洪朝豐表示近半年內,因為四周處去遊歷,到過老撾、曼谷、清邁、暹粒,又在清邁出家禪修,突然間發覺生命其實包含了當中的意義。
洪朝豐續說:「對我嚟講現階段生命意義係在於要做一個喜悅自己,同埋有益於人嘅人,喜悅自己就係嚟到呢個世界,應該要好好對自己、𠱁自己開心,對個社會、周圍環境要有小小貢獻,所以對自己好亦要對人好,人哋透過你身上睇到一啲嘢,譬如得到一啲鼓勵、溫暖、安慰。自從明白咗生命就係咁簡單後就好開心,咁就唔捨得死,覺得生命係好有意思、好有趣,覺得自己60歲嘅時候,我有個生日願望,就係長命百歲,慢慢又覺得生命好好玩,唔捨得百歲就走,不如係咁意去到百二歲。」
洪朝豐去年推出著作《風雨之後─我的舌癌筆記》,成為中學生好書龍虎榜50大好書,令他深感鼓舞,因此他想今年能到全港中學做講座,藉自己抗癌經歷激勵學生。因為有太多事想做,洪朝豐自覺要有更健康的身體:「我都有啲計劃包括錄歌,錄一啲我好鍾意嘅歌再出唱片,我因為要做好多嘢,好需要有個精神喺度,呢個『龍馬精神』都係祝願自己有好似龍好似馬咁嘅精神,去做一啲喜悅自己嘅事,同埋有益於人嘅事,呢四個字,亦都代表我對三個好朋友嘅一份心事,因為佢哋非常唔好彩,佢哋都有癌病……」
年輕阿伯
生肖屬豬的洪朝豐剛登六,但因心境開朗自問外表不似60歲,但會否介意被稱「阿伯」?洪朝豐笑說:「首先我咁情況係唔會有人叫我做阿伯……」他表示早前跟一位法師講到自己60大壽時,法師有點難以置信,指他看來頂多似40歲,洪朝豐笑謂:「我唔覺得佢係𠱁我開心,因為唔係淨係佢一個人同我講類似嘅說話,但當然如果有個人叫我做阿伯,我會點反應呢?我會笑一笑囉!呢個阿伯活到60歲,畢竟一個好年輕阿伯、同埋係好開心嘅阿伯!」