網絡女神馬俊怡（Rose Ma）日前相約好友李蔓瑩（Renee）化身可愛女僕慶祝鼠年，為充滿日系夢幻感覺的女僕主題餐廳添上傳統氣氛，Rose Ma笑言換上女僕打扮，頓時變得溫柔，兩位女神前一句「主人」，後一句「主人」，感覺夢幻。Renee變身女僕後，小酒窩加上甜美笑容，就𠱁得「主人」滿心歡喜。Rose Ma更親自炮製紅粉菲菲特飲，祝福香港人鼠年好運連連。
孤伶伶獨自過節
Rose Ma自言經常到訪不同女僕餐廳：「我鍾意睇動漫，所以都會幻想自己變成女僕，因為好唔真實，同平時嗰個我好唔同。日本同香港嘅女僕cafe我都去過，我成日都去，因為好似去咗第二個世界咁，好得意。我諗日本同香港女僕cafe最唔同就係語言，同埋日本嘅女僕會有距離感，佢哋唔會坐低同主人傾偈，但香港嗰啲就會。」
農曆新年，為食妹Rose Ma笑言最重要是食：「我一定要食蘿蔔糕，仲要睇吓邊間好食早啲訂定。」她又謂近年家人會趁農曆新年外遊，多數孤伶伶獨自過：「細個屋企都有放全盒，𠵱家冇人會嚟，連全盒都唔使擺。」那就不怕親戚們問尷尬問題？Rose Ma說：「最尷尬唔係問啲乜，反而係我有啲內地親戚，佢哋比較搵到錢，又鍾意比較人工、幾時結婚嗰啲。我啲表姐、表妹一早結晒婚，二十幾歲，得返我未結，好似我遲婚咁囉，不過都冇辦法，我覺得自己咁先係正常。」
預早同阿澤拜年
Renee今個新年則有特別任務，是安排愛貓相睇：「因為我有隻未絕育嘅英國短毛貓，好多朋友想帶貓女嚟識吓我隻貓，所以初三我安排咗佢同啲貓女相睇。」有份為杜汶澤網台拍節目的她，表示已提早向老闆阿澤拜年：「杜生新年應該要陪屋企人周圍去，所以我早啲同佢拜年，問佢攞利是。」
採訪：盧妹
攝影：仇志德
場地提供：從…異世界re:Worlds Maid cafe