【本報訊】庚子年，香港人不能團圓的一年。有人被拘留還押，有人因與家人意見不合遭趕出家門，也有人被迫與家人斷絕關係，「相濡以沫，不如相忘於江湖」。Noddy（化名）和父親這對抗爭父子，有相同理念，但兩個多月前要分開居住，「身邊有人被捕，加上唔止一次俾人跟蹤，所以分開，最怕黑警未死全家，我哋就死全家。」父感歎：「以前（農曆新年）會一家行街睇戲，𠵱家家庭樂係抗爭。」
「我哋有交低遺書」
21歲的Noddy和爸爸自8月開始參與示威和抗爭，情如手足，又血濃於水。「出到去佢都會叫我老竇，手足聽到，多數會話父子兵咁好；但都有試過觸動個別同家人關係比較差嘅手足，『你阿爸出嚟好叻咩，我俾阿爸趕出嚟㗎』」。聽聞過家長禁足，甚至經濟封鎖兒女，「我都好想認佢哋做仔女，但能力有限。」肯跟兒子一起上最前線，學睇連登和Telegram，親自駕家長者接送，應是萬中無一。
1月19日，民間集會團隊於中環遮打花園舉辦「天下制裁」集會，Noddy有事遲來，爸爸心急如焚。集會突被警方腰斬，催淚硝煙四起，爸爸四處張望，深怕兒子下車被攔截。「如果我哋分開，係會好驚搵唔到對方」Noddy說。父子有共識，任何一個被捕，另一個不會去營救，但會盡快協助保釋。「我哋有交低遺書畀人，分開住係基本；同埋點解阿媽唔出嚟（抗爭），係因為我哋（父子）其中一個消失咗，都有人執屍，或者有人將真相公諸於世。」「唔使好似彥琳咁，家人都冇咗。」爸爸說。「情感上阿爸梗係唔想睇住個仔死或受傷。但作為香港人，如果個個都係咁諗，呢個運動咪冇發生過？我個仔都話得我好啱，個個都係咁諗咪冇人出嚟？香港係香港人自己救」。
■記者程詩敏