同D公子食午飯，向佢提起，不少藍絲有錢人向大學校長聲言，以後唔再捐錢畀大學，有啲人仲講到要收回捐款。D公子嘆曰：「此乃古老教仔方法，你唔聽話，我閂水喉，現在已是21世紀，唔通嘞。君君臣臣，父父子子，長幼有序，是一套教仔女方法、傳統。假若君不君，臣不臣，這又如何？」
咁就令左丁山記起，讀中大時必修大一國文，孟子係必考，當年一年級生人人要刨孟子全書。君臣父子之說，源自「論語」，孟子亦有講及：「君臣有義，夫婦有別，長幼有序，朋友有信。」假如君不君，臣不臣又如何？「孟子梁惠王下」有：「聞誅一夫紂矣，未聞弒君也」，紂就是商紂王，這位暴君無仁無義無信，作惡天下，諸侯姬昌「替天行道」，「諸侯抗命」，妄視王法，臨終囑次子姬發出兵討伐商紂王；商軍大敗，紂王自焚，姬發建立「周朝」，稱武王，追封父親為「文王」。姬昌謀反，姬發完其志，以下犯上，古時稱為「弒君」，罪大惡極，但孟子講君君臣臣，同時又話「聞誅一夫紂矣，未聞弒君也」，可知孟子頭腦清醒到極，對是非黑白分別得好清楚。延伸到21世紀香港之公民抗命，如果孟子為辯護律師，講呢句為辯詞，唔知法官如何處理呢？
今時今日香港講「君臣有義」，得個笑字，這是君不君，臣不臣的時代；林鄭特首驕橫，自行其是，成班行政會議成員如橡皮圖章，全失「諮詢」諫臣作用，啲司局長更加係聽話聽命一輩，只識面對議員背誦機械式答案，點會贏得市民尊敬尊重？
與D公子講呢啲嘢就容易損及胃口，講食好過。D公子之公司廚房呢日奉上一味普通不過之臘味，有臘肉臘腸膶腸臘鴨，件件正斗到極，又碰啱左丁山喜歡食臘肉，幾乎食到不停口，於是問D公子：「廚房去邊度買貨？」D公子當然唔知呢啲小事，話問番廚房先至通知番左丁山。知道後，當然要去供應商舖頭買番一兩斤啦。
呢餐飯幾有意思，聽K教授與D公子對談，論及錢穆、余英時、傅斯年、胡適著作，左丁山學到唔少嘢，K教授講當今中國內地，讀書人好喜歡胡適，不斷有人論及胡適思想，當然唔會講得太大膽，而係盡在不言中。D公子話胡適著作，能傳世者恐怕不及錢先生之多，但論思想，則更具影響力。以左丁山愚見，胡適為中國現代第一位自由主義者，在民國時代暢所欲言，為今天中國知識分子羨慕之事。威權主義當道之時，知識分子只能是識字分子，識字而讀胡適，大概還不至於要入住秦城啩。