黃浩然本是無綫親生仔，去年約滿後轉投古天樂旗下的經理人公司，44歲的他拍電影出道，相信今年會大展拳腳。今日年初二，黃浩然與新公司的眾弟妹一起食盆菜，寓意賺到盆滿缽滿，而被推舉為大師兄的他，即場派利是炒熱氣氛。
採訪︰何永寧
攝影︰林德雄
今日年初二開年，剛加盟古天樂旗下經理人公司天下一的黃浩然趁機跟一班同門食盆菜開年。雖然新來新豬肉，但論入行年資，黃浩然1994年出道，之後演出杜琪峯導演的《十萬火急》，自然成為眾人大師兄。今趟出席開年飯，還有拍過《點五步》的胡子彤、林家熙，「文青女神」袁澧林、吳肇軒、胡卓希和張蔓莎，熱鬧非常。
家族影大合照
埋位食盆菜前，他們各自寫揮春互祝身體健康兼萬事勝意，煎年糕同蘿蔔糕的責任就落在袁澧林身上，壓軸好戲是身為「長輩」的黃浩然派利是，是最受眾後生仔歡迎的環節。講到新春節目，黃浩然自言較年長，也較傳統︰「每年會斟茶畀長輩，過年盡量喺香港，初一、二同長輩拜年，過年係好緊要。我細個過年爸爸會帶我睇戲，睇最多戲就係過年時。」他謂新春大合照是指定動作，「屋企幾大家族，媽咪嗰邊有九個兄弟姊妹，婆婆四代同堂，所以一定會影張大合照。做嘢攰時睇返會好開心，有溫暖嘅感覺。」
胡子彤初一一定要跟爺爺嫲嫲拜年︰「爺爺今年100歲，今年好特別，本來諗住去旅行，最後都係唔好，要喺香港陪爺爺。新年都係一家食飯，夜晚會再同表兄弟姊妹一齊食開年飯、打吓麻雀，每年見晒遠房親戚，交代晒成年嘅近況，過年就係要呢個感覺。」他表示希望2020工作順利，今年會訂為修行年，沉澱入行三年的經歷。新年前他剛跟「女飛魚」歐鎧淳甩拖，自言沒有特別抗拒感情，「感情隨緣啦，唔會抗拒，要嚟就嚟。」身旁的大師兄黃浩然即幫手解圍︰「唔好抗拒啦，唔通有唔要咩，我就話唔得啫，你後生仔梗係得啦。」
袁澧林請出埠
袁澧林今年會跟媽咪、細妹出埠旅行過年，她笑言每次看旅行相都會好開心︰「今年會請屋企人去旅行，唔知點解講講吓係我請囉，不過開心嘅。仲有樣嘢畀媽咪呃咗十幾年，話啲利是儲起咗，而拍拖都係隨緣啦。」
胡卓希與林家熙都分別有在內地拜年𢭃利是的經驗，卓希表示細個收到不少一元、二元的紙幣利是。家熙過年習俗是年初一全家會食齋，談到少時在內地收利是經驗，在場各人都非常羨慕︰「內地有個舅父好有錢，佢畀利是係一叠成兩吋厚嘅一百蚊（人民幣）紙，有五個小朋友一人一叠。」吳肇軒過年節目離不開拜年，今年有個新願望，希望可以首次過150磅，還差20磅就成功。張蔓莎指今年鼠年特別重要，因為是12生肖之始，只要鼠年開得好，打後11年都會順風順水，又自爆跟袁澧林同一遭遇，多年的利是錢都給媽咪「儲起」。
場地提供：名廚
胡子彤、林家熙髮型：Keith of Orient4
張蔓莎、吳肇軒髮型：Alex of Orient4