現年28歲的張沛樂（沙律），天生一副好身材，去年豬年有不少工作機會，但卻跟男友林耀聲分手，「深黃」的她更與「深藍」家人反目，父母甚至曾出言要斷絕關係，沙律被迫離家獨居。一提起跟家人的關係，沙律即時爆喊，但她表示不會放棄家人，會努力溝通重建關係，希望跟香港前途一樣鼠年會變好。
沙律和林耀聲去年分手，跟家人的關係又陷入僵局，《蘋果》請來玄學家吳佩孚為她預測鼠年運程：「佢屬羊，鼠年犯太歲，感情方面唔好，但感情唔單止代表男女，仲有家人朋友都係。男女感情運麻麻，但佢嘅事業同名氣會大升，佢啱做娛樂圈，要2022先有好姻緣，31歲後先嫁得好。佢仲有夫人運，即嫁啲權貴有錢人。」吳佩孚指沙律適合找成熟男，起碼年長10年甚至離過婚。沙律不忘心繫香港，吳佩孚預測：「2019年好多學生被拉，今年調轉，壞警察會入囚，繩之於法，香港唔會再差。」
搬出獨居
沙律跟父母因政見不同，在家中經常嗌交，「深黃」大戰「深藍」，問到此事沙律即時爆喊：「好傷心，人生出嚟都係想有愛同善良，應該幫助身邊無助嘅人，我屋企人信佛，但竟然話殺生唔殘忍。」跟父母關係變差，父母甚至曾出言威嚇斷絕關係，沙律說：「價值觀唔會喺半年內話變就變，冇法子，大家收嘅訊息唔同，有時唔想傾，惟有接受你哋係咁諗，但你唔好再夾硬行埋嚟同我嘈，已不停避又收埋自己，但係仲要同我嗌交，甚至乎話如果我再有咁嘅諗法，就唔認我做女！」
為免再與家人正面衝突，沙律近日搬離外出獨居，暫時仍未跟家人聯絡，她坦認一直以來跟家人相處已有問題：「我樂意分享，但佢哋唔會聽，我入呢行媽咪OK，又或者佢對我根本冇乜想法，而爸爸係傳統，只有佢一套，唔跟就講好似『垃圾』、『廢物』呢啲好難聽嘅說話。我由細到大都好努力，屋企係小康之家，我可以唔使咁努力，但我想證明畀佢哋睇呢個世界唔止係咁。」
有追求者
沙律指跟家人關係如此，並非單純因社會運動，而是根本欠缺愛，家人只識用金錢去表達對沙律的「愛」，縱使如此，沙律表示將來仍會照顧雙親，亦會努力跟他們溝通。她去年跟男友林耀聲分手，她坦認身邊已有不少追求者：「但唔想諗住，想搵真係適合自己。」她直認重視愛情，皆因愛是她的動力。
採訪：寶妮
攝影：仇志德