【恭喜發財】
香港在豬年經歷前所未見的動盪，實在有點悲。今日大年初一，人人皆希望新一年行個大運，訴求可以一一實現。為顯示誠心，不少人也會踏正鼠年就開始出動。想成功行運接吉神，當然時間、方向也不能求其，玄學家楊天命就指一條明路給大家齊齊和你行。
初一早起有運行
一開始，楊師傅就話：「我們常說行運行運，運是要行回來的。」咁大年初一，要幾點行最好呢？「大年初一朝早7時至9時可行大運，又或者中午11時至1時也可。」晨早出動的駕車一族，可放個大大的金元寶在車中，加強接吉神的運勢。
先去西北再向西
至於行大運方向，楊師傅叫大家不要食西北風，但要向西北方向行。楊師傅說：「向西北方行是接貴神，甚麼是貴神？可以有助地位提升及認識多一點富貴朋友，工作容易有貴人相助。向西北方向行至少大概30分鐘。」希望一整年行運，但卻又偷懶行得太少，自己想一想貴神夠唔夠力撐喇。
楊師傅說：「第二個是向着西方行，就是可以接吉神。吉神代表着甚麼也變好，所以可以向着西北方行完後再向西行，那就兩個神也接了。」吉神代表凡事可順利一點，任何事也好，包括財運、桃花運及事業運也好，最緊要唔好多幾個經常「混吉」的高官就已經夠好。
穿金戴銀開車窗
如果行大運當日，想更加容易接到貴神及吉神，着甚麼顏色衫會較好呢？楊師傅說：「大年初一是丁卯日，丁卯日最旺財的顏色是白色、金色及銀色，那天穿白色、金色及銀色的衣服，又或者多帶金鏈銀鏈等金屬飾品，就可以加強金屬的氣場接吉神。」師傅更強調：「記住一路行可以一路動作大一點去迎接神，如果駕車的話，要迎接財神，最好打開窗才有風飄入來，要迎着那股氣。」最完美方案當然是駕駛往西北方或西方後，然後落車再繼續向西北方行。
食碗糖水搵財神
大年初一，西北是好方位，各位記住計好時間就落街向西北行。有車一族的朋友，行運就不妨行大一點，來個遊車河行大運。香港的大西北豈非屯門、元朗及天水圍地區。楊師傅：「對呀。大家住九龍或港島區唔怕遠的，咪入去大西北食個糖水出來。」如果住港島東又唔想過海的話，也可以向西方行，即去到堅尼地城，也是不俗的遊車河路線。本來住西北的朋友，如元朗或屯門那區，師傅就建議最好在行大運前的時間，去一些東面地方行花市，夠鐘時就向西北方向回家，帶埋財神及吉神回家就更加完美。
有信念就會行運
有些人常常說拿着風車行，轉快一點，運氣就會強一點好一點。楊師傅認同說：「對，也是好的轉大運。不過若然你上年行衰運就要拿風車轉走衰氣，但如果上年好好運便會越轉越衰，轉運就是扭轉命運的意思。你覺得2019年運程不太好才需要買風車轉，否則不用買。」若然是這樣，只怕當晚到時全香港人會一人拿一個風車不停轉，幫香港轉走衰氣，轉走埋那些瘟神。問到香港於2020年的運勢怎樣？楊師傅：「運勢一般，但有高官會落台。」嘩，唔好𠱁香港人開心喎！「說到香港整體運程，運氣講比較，怎也會比2019年好，不過好多朋友問我應唔應該移民，我都認為長遠計有能力就移吧。如何也好，做人最重要是有信念，要信自己。」
採訪：果籽汽車組
攝影：果籽攝影組