今日年初一，預祝各位蘋果讀者身壯力健、四季平安、無病無痛、買馬中大冷、賭波中波膽。新年最緊要係保持健康，發財其次。
由於立春在2月4日，今日雖是年初一，按照節氣，今日出生人士不是鼠人，仍是豬。不過講住先啦，鼠年係庚子年，庚屬金，子屬鼠，老鼠帶金，係金老鼠。希望呢隻金鼠係迪士尼之米奇老鼠類，米奇老鼠為迪士尼打天下，帶來大量財富，所以唔好討厭老鼠呀，老鼠奔走靈活，來去如風，擇肥而噬，一個人如能有老鼠優點，去其缺點，一定快樂無比。
踏入2020年，武漢就「正式」發現武漢肺炎（新型冠狀病毒），令人諗起2003年上半年之沙士，猶有餘悸。2003年全港市民同心對抗病疫，2020年全港一分為二，黃藍二色終日爭拗不休，連去邊度食飯都要掛住呢個黃色，嗰個藍色，增加心理負擔，對健康肯定有損。左丁山奉行自由競爭主義，健康優先（Health First），從來拒絕外來壓力，只聽自己話，跟自己走，如果唔係，先聽黃絲又聽藍絲，心態不斷動搖，何來自主，不患上焦慮症先至奇怪。
過年前，D公子請大教授K吃午飯，搵左丁山作陪客，D公子飽覽文史哲，對錢穆先生著作，滾瓜爛熟，問左丁山見過錢先生未？余生也晚，冇資格上錢穆堂，後來錢先生返新亞演講時，適逢左丁山已是校會理事，有幸同佢拍照留念，至於錢生著作，最熟當然係《中國歷代政治得失》與《國史大綱》啦，點知D公子連錢先生嘅《先秦諸子繫年》、《朱子新學案》都讀埋，與K教授討論，左丁山唯有得個聽字，冇搭嘴資格，D公子係世家子弟，富二代有D公子咁熟讀經書者，可能只有佢一個。後來講到時事，左丁山先有機會出聲，發表意見。K教授言簡意賅，佢話：「我相信鄧小平提出之一國兩制，係偉大建議，但基本法文字是死嘅，制定後如何執行，解釋是生嘅。回歸22年，世界局勢、香港情況不斷變化，每每測試基本法條文如何執行，可惜嘅係，呢十幾年來，每次對北京香港歧見之解決方式，都傾向以一國為主，忽視兩制之存在意義，此乃目前之危機。」K教授果然眼光獨到，一語中的。
可惜吖，中國今天再無鄧小平以至李瑞環、喬石呢類人物，習近平明顯係喜歡毛澤東多過崇敬鄧小平，他一日掌權，香港基本法就一日從嚴詮釋，是故年輕人愈來愈不安，黃色青年與藍色老人爭執不絕！