今日是大年初一，踏入鼠年，佘詩曼（阿佘）祝願大家心想事成，鼠年行大運！戴上老鼠耳朵頭飾的阿佘，在主題樂園遊玩慶新春，與米奇和米妮合照，阿佘又到餐廳應節吃「鮑魚撈起」，她開心地說：「生意興隆，笑口常開，撈起，撈起，大家一齊撈起，全香港人撈起撈起！」
採訪：黃曉妍、鍾國仁
攝影：郭賢興
為迎接新一年，佘詩曼每年都會將家居佈置得充滿賀年色彩，她除了貼揮春，更會與媽媽一起整蘿蔔糕，阿佘大讚媽媽犀利：「佢好勁，每年會整二十幾、三十底蘿蔔糕，佢會送畀街坊，因為好多人都會向佢落單，所以我都會幫手整吓。」阿佘還記得外婆以前都會炸油角，但由於媽媽不喜歡吃甜，所以現在很少做。
初一唔用刀
至於賀年習俗，阿佘表示在大年初一不會用刀：「前一晚我哋要切好晒蘿蔔糕，大年初一中午就煎嚟食，夜晚就唔煮飯，通常我哋會出街食西餐，因為媽咪成日煮飯，所以佢話大年初一唔煮喇，加上新年食西餐，一定有位吖嘛，我諗呢個習俗都有10年。」阿佘向來廚藝了得，會否親自下廚煮團年飯和開年飯？她笑說：「我有幫吓手，做一啲事前準備，但因為媽咪好緊張呢餐團年飯，所以佢會負責煮，佢希望每樣餸都係完美，所以佢自己會一手包辦。賀年菜式都係髮菜蠔豉（發財好事）、蝦（笑哈哈）、有魚有肉又有雞，一般家庭菜。」
除夕開賭局
辛勞了一年，難得有假期，阿佘每年除夕夜一定會與家人、朋友開大型新春賭局：「我哋會玩到好夜，通常會輪流做莊，發唔發新年財就睇吓大家有冇運，其實做莊通常都會贏，所以我會第一個搶住做莊。」由於太夜瞓，所以阿佘在大年初一多數會瞓到自然醒，然後準備去拜年，她說：「我又好貪靚，唔想每張相都一樣，所以我會換幾套衫向長輩拜年。」阿佘笑言最開心現在還可跟長輩𢭃利是，她笑謂：「佢哋成日都話『嘩，你仲有份？』我話『係呀，多謝大家！』」會否心急找個真命天子？阿佘直言希望今年會找到，希望有頭緒。
場地提供：香港迪士尼樂園
化妝：Katherine Lo
髮型：Seiko Sin of Hair Culture
造型：Christina Hsu
服裝：Alexander Wang of Lane Crawford
