年初一講呢啲，似乎傷感情，但實在抵唔住頸：香港片商竟然若無其事推出《家有囍事2020》賀歲！係百戰百勝的長壽系列又點話，經歷過去七個月無喜可言的家事，編劇要運用何等超宇宙想像力，方可悉心安排嘻哈絕倒的一百分鐘，製造歌舞昇平幻象？福無雙至禍不單行，黑警暴政咄咄逼人之餘，還措手不及殺出鋪天蓋地的武漢肺炎，沙士恐懼捲土重來，全港風聲鶴唳，在這種非常時期，你認為什麼人會歡天喜地戴住口罩，操進戲院接受娛樂洗禮？呢嗱，大陸院商就叻嘞，年廿九全國抽起七部賀歲片，與其打開門拍烏蠅，不若閂埋門蜷縮冬眠，理得你紮穩馬步準備《奪冠》又好，孖住當紅日本男明星第三度《唐人街探案》又好，都不敵來勢洶洶的狂野大陸病毒出沒，《姜子牙》《急先鋒》《囧媽》裙拉褲甩殊途同歸，統統夾着尾巴逃離戲院，加入真實生活的緊急救援去了。
西片那部《怪醫D老篤》，全球劣評如潮，似乎有意和《CATS》爭奪渣片之王寶座──奇怪，此片為何沒有順理成章譯《群貓亂舞》，難道怕得罪貓奴？《做少少醫生》得到這樣懶卡哇兒的中文譯名，對票房有沒有實際幫助不得而知，但從英語會話教學角度來看，多少有教壞細路之弊，勉強要用那三個特定的字，發音無論如何比較接近「篤老D」吧（真的十分勉強，係都要篤，不如「篤呢D」），夾硬玩音樂椅，簡直老點，可憐的小朋友二十六個字母尚未學齊就被迫經歷此浩劫，於心何忍啊。至於黃子華的《乜代宗師》，假如我在香港，是必必必撐的，講完。