武漢肺炎搞到中港兩地聞者色變，噚日仲有專家話，蛇可能係武漢肺炎源頭，咁樣搞一搞，搞到連係商界享負盛名、年年到冬天好多商界、金融界人士等住食嘅恒生銀行蛇羮，今年都要暫停。
恒生銀行呢個蛇宴有幾十年歷史，每年入冬天至農曆年前，銀行都會宴請城中政商VIP，去該行總行24樓宴會廳「博愛堂」食蛇羮，多年來已成為中環商界重要文化聯誼，而蛇宴有傳源自恒生創辦人之一何善衡發起，亦有講法謂「恒生三老」之一何添的建議，不過發揚光大就因當年聘得名廚李煜霖掌舵。「霖哥」係名廚李才嫡傳弟子，而李才曾受聘於創製太史蛇羹聞名「江太史」江孔殷為家廚，所以恒生出品亦盡得太史蛇羮精粹。
不過恒生發言人話，因應疫情影響，「我們已決定即時暫停於商務宴會中為客人提供蛇羹的選擇」，又強調多年來使用嘅蛇肉乃來自政府認可持牌供應商從印尼入口，今次唔係第一次恒生叫停蛇羮，當年香港爆發沙士，恒生亦暫停蛇宴。