臨近歲晚，撞正有公司唔準時出糧，有班打工仔嬲到PK。話說潘蘇通私人公司高銀國際旗下嘅項目傲玟，總承建商金門未出糧畀班工人，結果噚日晏就幾十人踩上高銀總部門外抗議，坐滿一條花圃，之後仲殺入大堂講數。
嬲嬲豬嘅工人怒火可以點樣平息？梗係承諾過年前磅水啦。高銀發言人話，本身已經按照正常程序過咗數畀總承建商金門，但臨近農曆新年要多啲時間處理，已經向金門發出咗支票，預計聽日內可以解決，一班工人就可以安心過年。
高銀國際2016年3月以63.8億元投到常盛街17號地皮，當時每方呎樓面地價10,899元，建成咗現時嘅豪宅傲玟，不過香港經濟差差哋嘅關係，項目至今只係透過招標賣出咗3伙而已，成交價由4,363萬至5,045萬蚊，銷情麻麻哋，睇嚟潘老闆唔單止要搵周潤發宣傳，隨時要搵埋劉德華幫手。
李華華
mailto:[email protected]