拿玻里隊長恩斯治尼喺周二嘅意盃八強賽，開賽兩分鐘嘅閃電入球，助球隊早早領先衞冕嘅拉素1:0，拉素喺五分鐘後有個機會扳平，卡些度喺禁區內俾希沙積侵犯博到個12碼，但恩莫比尼主射時滑倒，皮球越楣而去，錯失追平機會。
兩隊仲喺上半場少踢一人，拿玻里嘅希沙積喺19分鐘兩黃一紅，拉素亦都有盧卡斯喺25分鐘犯規領黃後，向球證抗議再領一張黃牌被逐。下半場，恩莫比尼同拿玻里嘅馬里奧雷爾都有一個入球越位在先而無效，法蘭斯高阿沙比喺補時嘅入球入網一樣因越位無效，拉素結果以0:1受挫拿玻里，無緣衞冕。拿玻里嘅四強賽對手就會係費倫天拿或者國際米蘭。