早前署理特首張建宗喺行會前見記者，當時佢係咁咳又冇戴口罩，連記者都為佢驚，問佢身體有冇事，小肥張聲稱只係飲水濁親，又話成個問責團隊身體好健康，但話口未完，食衞局局長陳肇始噚日見記者時，又係多次狂咳、又係唔戴口罩，最令人驚嚇係，佢手下副局長徐德義去過武漢疫區。先有小肥張、再有「姑娘」陳肇始狂咳，咁究竟其他問責官係咪真係身體好健康？有冇其他官中招？
陳肇始噚日見記者時多次狂咳，不過本身係護士嘅陳就冇戴口罩，只係低頭不斷吞口水忍咳，當真係忍唔住就以單手同手上嘅A4紙掩口，而當時佢身邊同佢前面就企晒自己嘅同事同記者。
但最令人關心係，佢個副局長徐德義同衞生署、醫院管理局代表，早排去過武漢疫區了解當地疫情，難免令人個心驚一驚，而陳肇始喺鏡頭前呼籲大家做好個人及環境衞生措施，又呼籲市民若前往武漢，應戴上口罩，回港後隔離14日，而佢自己咳成咁又唔戴口罩，反而現場採訪嘅記者幾乎全數戴上，有記者問陳會否帶頭係公眾場合戴口罩，同埋呼籲公務員戴口罩返工，陳就答非所問：「如果我有唔舒服，或者去一啲人多擠迫嘅地方，或者去醫院……我哋都一定，呼籲市民戴口罩。」跟住就走咗去。