效力法甲班霸巴黎聖日耳門（PSG）嘅基利安麥巴比，近兩季不斷同西甲勁旅皇家馬德里扯上關係，日前呢位法國前鋒出席自己名下慈善基金活動嘅時候，再一次指現任皇馬教練、一代法國球王施丹係佢嘅兒時偶像，咁識賣口乖，唔通暗示要上「艦」？但係佢早前又猛讚紅軍勁到不得了，睇嚟佢真係心大心細！
1998年出世嘅麥巴比，日前喺巴黎搞咗個活動，推廣佢新成立嘅慈善基金，而呢個基金初步會為98名年齡介乎9至16歲青少年提供成長上嘅協助。年紀輕輕已經獲獎無數，連世界盃都捧過嘅麥巴比，喺活動上分享咗唔少成長過程嘅經歷，又話自己細細個已經視法國球王施丹為偶像。
封施丹為兒時偶像
麥巴比話自己喺唔同階段有唔同嘅偶像，佢仲係細路哥嘅時候，就同其他法國人一樣最崇拜施丹，咁啱得咁蹺，施丹正正就係喺98年協助法國喺主場贏得世界盃。麥巴比跟往又話，佢亦都好鍾意葡萄牙嘅基斯坦奴朗拿度（C朗），仲好慶幸曾經對方同場較量。除此之外，巴西嗰個正版朗度拿亦都排喺麥巴比嘅偶像排名榜第三位。即係話，麥巴比喺成長過程入面嘅偶像全部都係皇馬球星，佢想成為「銀河艦隊」一員，直係一啲都唔出奇。
事實上，麥巴比一直都恨捧歐聯錦標，但PSG近幾年喺歐聯都冇乜作為，上季喺16強賽事，佢哋明明帶住首回合領先兩球嘅優勢，都可以俾曼聯喺次回合贏3:1，最終俾紅魔憑住作客入球優勢踢出局，曾經13次成為歐洲冠軍嘅皇馬，絕對係麥巴比理想嘅下一站。
話今季踢埋PSG至講
除咗皇馬之外，連續兩季殺入歐聯決賽，上季仲贏埋冠軍嘅英超勁旅利物浦，據報亦都對呢位21歲新星虎視眈眈。麥巴比早兩日先大讚利物浦，今季就算每兩、三日就要踢一場波，都可以好似機器咁贏到唔識停，真係勁到不得了。
對於轉會傳聞，麥巴比就話如果喺以前，佢一定會飄飄然咁講埋一份，但𠵱家咁大個人已經識分輕重。佢重申，唔會喺一月談論轉會問題，又話今時今日能夠成為超級巨星，都係多得PSG悉心栽培，所以今季仍然會全心全意為球會爭取錦標，其他嘅事，一律留番球季完咗先講。都講到咁，算唔算暗示自己喺PSG踢埋今季就會走人？