黃色經濟圈搞得有聲有色，飲食業更係橋頭堡，黃店餐廳齊上齊落隨時喺今年立法會選舉成功起義踢走廿蚊張，可能因為咁，建制派唔敢怠慢，尊貴嘅新民黨主席葉劉淑儀都親自出動「搵生意」，銅鑼灣平民牛扒店Top Blade Steak Lab就喺facebook專頁爆料，噚日迎來呢位貴客幫襯。
爆同事驚黃色經濟圈
葉劉之前出過聲睇死黃色經濟圈唔得，但呢頭口裏說不，點解嗰頭身體就好誠實，真金白銀撐黃店？其實世上沒有無緣無故嘅愛，牛扒店嘢食再好，但被葉劉睇中就因為手上有一票，負責人話葉劉嚟到落完個外賣柯打，就一個轉身直殺入廚房搵老闆，然後劈頭就問佢哋有冇登記做選民。
今時今日做得黃店當然係已經覺醒，又點會未登記呢！腦細就話自己當時反問葉劉，家陣係咪負責埋選民登記工作，然後用「廚房危險」為由借啲意送佢走，葉劉就解釋，自己係幫同事手，因為佢哋驚啲黃色經濟喎。佢之後再追問舖頭商業登記喺邊同影相，結果幫襯個牛油果煎蛋漢堡盛惠100蚊有找但就打搞人哋一大輪，腦細最後送葉劉一程到門口，仲坦白自揭身份同多謝葉劉支持黃色小店。而葉劉似乎呢個時候先發現自己中伏，就死兜話「最緊要唔好暴力啦，同埋最好唔好搞乜嘢黃色經濟啦」，然後急急腳走人。
葉劉嘅加持隨時係死亡之吻，餐廳如果唔率先自爆，小店之後隨時水洗都唔清，佢哋仲為咗紀念葉劉呢次對黃色經濟圈嘅支持，已經將呢單生意額全數捐畀立場新聞，網民就大讚餐廳有良知，仲話污糟錢捐咗去係最啱。
李八方