如在學界排壇提到筲箕灣官立中學，球迷或會立即想起該校男排在15/16球季於港九區D1學界賽封王的「黃金一代」。不過，筲官女排今季巾幗不讓鬚眉，雖與男排在D1雙雙屈居亞軍，但成為近10年唯一男、女排皆能在D1殺入決賽的學校。筲官排球主帥黃世峰直言：「對學校嚟講係個里程碑，亦都證明畀啲弱勢學校睇，男女校都可以做到呢個成績。」
記者：許嘉明
筲官男排向來是學界排壇的勁旅，近5年3入決賽，15/16球季在施瑋斌、李庭臻等「黃金一代」的帶領下，曾造出港九區D1學界賽冠軍及精英賽亞軍的亮麗成績。昔日的王牌主攻手施瑋斌今年重返母校執教鞭，女排在其領軍下一路過關斬將，先在港九區D1分組賽得4勝1負的成績晉級4強，再於4強激戰近2小時下以局數2:1反勝拔萃女書院，創隊史殺入決賽。
筲官女排最終在決賽直落兩局不敵順德聯誼總會鄭裕彤中學，但隊長樊家彤直言已是全隊的里程碑︰「就算其他人賽前唔睇好我哋，我依然相信可以贏冠軍，點都會有奇蹟。」首次打入港九區D1女排決賽，便能在修頓作戰，樊家彤直言從未試過如此緊張：「一行到上嚟，個心已經卜卜跳。雖然學校曾經租場畀我哋熱身，但有咁多觀眾，個氣氛好唔同。」
十年一遇望感染師妹
雖然筲官屈居亞軍，但她們在決賽打出拼勁，樊家彤指出球隊比起分組賽不敵鄭裕彤的時候亦有顯著進步，這位就讀中五的隊長笑言：「我哋今次攔網好咗，上次都冇乜點touch到，但今次都有攔到，畀到啲壓力佢哋。」她續指今年接棒成隊長後需肩負搶分重任，對自己也是一大突破。昔日男排「黃金一代」在D1贏得冠軍，為一班師弟妹播下夢想的種籽，令一班後輩有清晰的奮鬥目標。樊家彤表示：「黃金一代嗰陣我讀緊中一，第一次睇排球比賽就係睇佢哋，我都好想試吓贏冠軍，可惜今次唔得。」她補充指今次取得亞軍是對教練施瑋斌的一個交代，同時希望能感染一班師妹，繼續為爭取佳績而努力。
「有一絲希望就要堅持」
筲官排球主帥黃世峰則指，雖然男、女排雙雙居亞，但仍感到滿意。在社會事件發酵下，筲官排球隊球員或多或少也受到影響，世峰sir直言：「我覺得學生喺咁困難嘅環境下，要兼顧學業同時又好關心社會時事，要再分時間喺排球度，其實好唔簡單。」他續指男、女排能一同打入D1決賽，近10年也只得筲官做到，最大原因是「堅持」二字：「今年成個環境都好緊張，但我訓示學生都係咁講，無論情況幾困難，我哋只要有一絲希望就要堅持，唔可以放棄。我覺得我哋雖然得亞軍，但男女排呢個成績係值得嘅，我哋可以好大聲話畀人知，我哋值得有呢個成績，唔係僥倖。」
