亞冠盃外圍賽次圈陸續上演，香港代表和富大埔星期二晚作客馬來西亞吉打，可惜喺火速失波兼上半場踢少一個嘅情況下，最後以1:5落敗，緣盡亞冠盃，將會轉戰亞協盃分組賽。
大埔貴為上季港超聯冠軍，但今季就面目全非，今場波之前一個星期左右，先搵到有職業教練牌照嘅塞爾維亞籍教頭戴貝碧（小圖）領軍，可以出戰亞冠外，但係戴貝碧都係喺馬來西亞先同球隊會合。
孫銘謙領紅半場打少個
大戰當前，大埔仲傷兵滿營，隊長杜度同澳洲籍中堅雲美亞斯等多個球員都有傷，但今場總算可以踢正選，但係麥保美同唐道碧兩個本地洋將都註冊唔到，勞高今場都冇份踢正選，季初表現好好嘅守門員陸平中都係趕唔切喺今場復出，要由何銳把關。正面啲睇都係勵志故事嚟，何銳上季踢花花，幫唔到球隊喺甲組護級，半年後就已經喺亞冠外比賽上陣。
不過勵志還勵志，大埔作客挑戰吉打就一早預咗係苦戰，三分鐘就俾對手嘅科特迪瓦籍前鋒迪捷捷禁區外起腳得手，火速落後0:1。21分鐘，迪捷捷仲起孖，把握到何銳甩手射成2:0。其實大埔都有攻勢，但係陳文輝嘅補射同許嘉樂嘅遠射都入唔到吉打龍門，仲因為一次角球攻勢令對手有反擊機會，孫銘謙以超技術阻對手單刀，34分鐘就領紅牌出場，大埔踢少個，但半場總算維持只係落後0:2。
大敗1:5陳文輝破蛋
不過，換邊後踢咗唔夠兩分鐘，踢少個嘅大埔又失多球，喺禁區解唔到圍，吉打由中場夏甸整多粒，領先到3:0。大埔即刻換入勞高博一博，只係單車都並唔係咁易就變到摩托，勞高出嚟冇耐就有球勁射，但都係俾吉打守門員伊夫域救到。大埔喺66分鐘失多球，但係有陳文輝喺68分鐘破蛋，總算帶嚟一啲正能量，吉打嘅迪捷捷喺補時仲「戴帽」，贏夠5:1完場，大埔出局，吉打就會喺下個星期作客韓職嘅FC首爾，爭入分組賽。大埔轉戰亞協盃會被編入I組，同組除咗有澳門鄒北記同中華台北代表大同，仲有一個席位由另一港超聯球隊傑志同外圍賽次圈勝方爭奪。
